• O alcalde, Valentín Calvín, recibiu á organización nun evento que serviu para intercambiar ideas e fortalecer conexións
• Durante a cita celebráronse sesións que permitiron aos participantes coñecer a outros profesionais e explorar novas vías de colaboración
Ortigueira exerceu de sede da organización empresarial BNI Atlas. Durante o día de onte, o alcalde da localidade, Valentín Calvín, foi o anfitrión dun encontro no que os líderes empresariais da rexión congregáronse para fortalecer as súas conexións e colaboracións.
O restaurante Orillamar de Espasante foi o espazo no que os membros do BNI Atlas compartiron as súas oportunidades de negocio, centráronse no poder das relacións empresariais e intercambiáronse ideas e experiencias para posibles colaboracións. É dicir, desenvolveuse un labor de networking a partir dunha serie de presentacións dos asistentes.
“Poder contar cunha representación de BNI, unha das maiores redes de relacións empresariais do mundo, é importante para Ortigueira. Temos que escoitar as necesidades dos emprendedores e coñecer as súas experiencias para poder consolidarnos como un municipio cunha actividade económica próspera”, apuntou o alcalde de Ortigueira, Valentín Calvín, ao termo da reunión.
“Estamos encantados de reunir a tantos líderes empresariais excepcionais en Ortigueira”, comentou Marc Perramon, presidente do BNI Atlas.”O enfoque da nosa organización en construír relacións sólidas e confiables demostrou ser unha fórmula exitosa para o crecemento dos negocios na nosa comunidade”, engadiu.
BNI Atlas é unha organización xurdida baixo o paraugas de BNI que suma máis dunha trintena de negocios de diferentes sectores xurdidos na contorna provincial. O seu obxectivo é ir sumando cada vez máis colaboracións para “crear sinerxias que redunden no beneficio de todos os asociados”.
