As medidas permitirán mellorar a corresponsabilidade ante o posible establecemento de regras que limiten o emprego de remanentes a partir de 2025.
Na sesión extraordinaria do Pleno celebrada hoxe acordouse modificar as ordenanzas fiscais reguladoras dos impostos sobre bens inmobles (IBI), vehículos de tracción mecánica (IVTM) e actividades económica (IAE), e a da taxa de recollida de lixo, cambios que entrarán en vigor co inicio do ano 2024.
O alcalde, José Manuel López Varela, explicou que a actualización que se leva a cabo faise porque “todos os indicios apuntan a que desde 2025 non se poderán empregar os remanentes por esixencia de Europa ante o déficit acumulado do Estado”, o que suporá que “os concellos paguen os pratos rotos” nun contexto económico “difícil” para as entidades locais. O rexedor explicou que a adaptación dos tributos faise para “ser consecuentes cos incrementos nos custes dos servizos e do mantemento das infraestruturas municipais”.
En relación ao IBI, o gravame establecerase no 0,44 %, (anteriormente estaba no mínimo permitido por lei do 0,40 %), manténdose como o menor tipo da comarca e sensiblemente por debaixo da media de Bergantiños e Costa da Morte (0,51 %).
Consérvanse as bonificacións para familias numerosas e inmobles con actividades económicas declaradas de interese ou utilidade municipal, e queda regulada por primeira vez para vivendas de protección oficial.
En canto ao IVTM, ata o de agora existía un coeficiente único do 1,20 que pasará a ser progresivo dun mínimo do 1,25 e un máximo de 1,40 para vehículos que superen os 20 cabalos fiscais.
O alcalde explicou que nos tres primeiros tramos, os que afectan ao 65 % do padrón municipal de vehículos, os incrementos serán de 0,63 euros ao ano para os que teñan menos de 8 cabalos fiscais, 1,70 euros para os de 8 a 12 e de 7,19 euros para os de 12 a 16.
Mantéñense as bonificacións aplicables a vehículos históricos e a aqueles con motores que non presentan incidencias sobre o medio ambiente, incluíndo por primeira vez os que empregan gas licuado de petróleo (GLP).
En relación á taxa do lixo, López Varela apuntou que o servizo de recollida, transporte e tratamento na planta de Sogama dos residuos sólidos urbanos presenta “un déficit moi importante” porque o recadado cubre unicamente o 57 % cando debería autofinanciarse. O cambio na ordenanza permitirá alcanzar unicamente o 70 % do desembolso que supón para o Concello, incluíndo os gastos da xestión do punto limpo, a recollida domiciliaria de voluminosos, a implantación do contedor marrón de orgánicos e o programa de compostaxe doméstica no rural. Tamén quedan establecidos dous novos tramos para adaptar as tarifas aos establecementos comerciais que presentan unha maior superficie.
Estas tres ordenanzas foron aprobadas cos votos en contra dos grupos municipais do PSOE e do BNG.
Os tres grupos municipais mostraron apoio unánime ao cambio na normativa fiscal municipal reguladora do IAE, en virtude do cal será creada unha categoría fiscal específica por ubicación das empresas.
