• Durante o mes de novembro, a Escola de Música de Ortigueira ofrecerá a través da súa canle de Youtube concertos das Bandas de Gaitas do concello, a Charanga ‘Ou Alecrín’ e o Conxunto Vocal da EMCO
• As estreas serán os mércores ás 20 horas
A Escola de Música de Ortigueira creou un programa especial para conmemorar durante o mes de novembro a Santa Icía, patroa da música. Na súa canle de Youtube poderanse ver os cinco concertos programados, todos os mércores ás 20 horas.
Os tres primeiros estreas pertencen á Saída de Bandas 2023. A Banda de Gaitas de Ladrido será quen inaugure a programación o día 1, á que lle seguirán a charanga ‘Ou Alecrín’ o día 8 e a Banda de Gaitas do Ortegal o 15.
A seguinte actuación trátase dunha proposta vocal por parte do Conxunto Vocal da EMCO, o día 22. Interpretará a canción ‘Cando ponse a lúa’, baixo a dirección de Juan Pablo Montero e con Alejandro Vázquez acompañando ao piano. A última cita desta programación especial será o mércores 29 e retomará a Saída de Bandas, esta vez por parte da Escola de Gaitas de Ortigueira.
Estas retransmisións son unha ferramenta para divulgar a cultura musical de Ortigueira a través dos diferentes grupos locais, así como dar a coñecer a escola e o seu labor entre os veciños e veciñas de Ortigueira, animándoos a formar parte dela. Así mesmo, tamén é unha forma de entretemento e lecer para aquelas persoas que non puideron asistir no seu día ás actuacións
Desde o Concello de Ortigueira animan a todos e todas a pasarse pola canle de Youtube da Escola de Música e gozar destes vídeos.
