A colaboración máis icónica da historia da música galega pecha xira en Capitol, onde todo empezou. Porque se acabou o verán, pero este venres en Santiago aínda poderemos gozar da última verbena.
Escoita aquí o disco de Ortiga e Pili Pampín
Comezaba o ano 2022 cando Ortiga e Pili Pampín uníronse por primeira vez; aquela colaboración no tema “Eu chorar chorei” estreouse en directo no mes de maio daquel ano, aproveitando a gran posta de longo de ‘Sabes el camino que elegí’, o concerto que Ortiga ofreceu, rodeado de amigxs, na Sala Capitol.
Aquel día -e aquel momento- cambiouno todo. O público toleou con aquilo, a colaboración non podía ser máis inesperada, pero tampouco podía funcionar mellor. O Chicho do Funk -Ortiga-, unha das mentes máis avanzadas e transversais da música contemporánea e Pili Pampín, unha das cantantes máis icónicas da música galega, demostraron unha capacidade insólita de retroalimentación entre sons que parecían afastados e que desde entón xa non poden entenderse por separado.
A ‘Eu chorar chorei’, sumáronse despois os temas ‘O galo (Remix)’, ‘Licor Café’ ou ‘Olvídame y pega la vuelta’ e, o pasado mes de maio, todo completouse e colleu forma no disco ‘Ortiga e Pili Pampín’, no que ademais se incluíron as cancións ‘Porque tú me enamoraste’, ‘Como yo te amo’, ‘A Santiago vou’ e ‘Deixa que saia’. Un traballo que non entende de etiquetas porque abarcouno todo, xa que ‘Ortiga e Pili Pampín’ é moito máis que un disco. Moito máis que música. É costumismo, folclore, cultura popular galega. Son repertorios clásicos, actualidade, house, rumba, reguetón… Todo sen perder de vista o principal, que é a conexión co público.
Unha conexión que creceu en cada un dos concertos que Ortiga e Pili Pampín ofreceron nos últimos meses, que non foron poucos. Porque en cada unha das datas, cando eles saían ao escenario, a mesura saltaba polo aire. Acompañados dun elenco de bailaríns brillantes -capaces de lograr que ninguén apartase a vista do escenario nin un segundo-, Ortiga e Pili Pampín fan tolear a un público que se presenta entregado á causa desde o mesmo momento que comprou a entrada.
A idade dos asistentes é inabarcable nun abanico, porque avós e netos, nais e fillas, amigxs, e ata mascotas en ocasións, deixáronse levar. Foi un verán no que Ortiga e Pili Pampín foron os reis do escenario, da pista de baile, e do corazón do seu público. Tamén conquistaron a todas as miradas curiosas que, en festivais, simplemente pasaban por alí. Ao final quedaron.
Pero todo o bo acábase, e así como hai unhas semanas deixabamos atrás o verán, agora toca dicir adeus a esta xira que tantas alegrías brindounos nos últimos meses. Será unha despedida ao grande; Ortiga e Pili Pampín botarán o resto este venres, na Sala Capitol de Santiago de Compostela, nun concerto que se prevee para o recordo; un pouquiño de calor para este outono chuvioso, a última gran verbena da colaboración máis icónica da historia da música galega.
Non faltará ninguén á cita e non hai nin unha soa razón para non sumarse á festa.
