As e os finalistas do proxecto educativo viaxarán á cidade de Málaga para asistir a un taller na EASD San Telmo
A creatividade para reinterpretar distintas obras de Pablo Picasso é a característica común dos gañadores do proxecto MACO, un programa educativo impulsado pola Concellaría de Educación, Emprego e Relacións Institucionais do Concello da Coruña, no marco das actividades do ano Picasso.
Ao proxecto, que naceu coa vocación de afondar na traxectoria persoal e artística de Picasso a través da colaboración das Escolas de Arte e Superior de Deseño da Coruña e Málaga, presentáronse 28 obras realizadas por alumnos e alumnas da Escola Superior de Arte e Deseño Pablo Picasso entre os que se elixiron 16 gañadores.
As e os premiados son dez mozas e seis mozos. Sete están a cursar a especialidade de Deseño Gráfico, outros sete son de Ilustración, un de Escultura aplicada ao espectáculo e un de Fotografía. Os traballos presentados ofrecen unha reinterpretación de diversas obras pictóricas e pratos de cerámica do xenial pintor para desenvolver e elaborar serigrafías, ilustracións, un libro pop-up ou un vestido en papel serigrafiado. Os proxectos seleccionados introducen as novas tecnoloxías, diferentes materiais e perspectivas persoais sobre aspectos como a maternidade, a anorexia, a moda ou a cidade para recrear o universo picassiano.
Os gañadores poderán materializar os seus proxectos durante a súa próxima estancia na EASD San Telmo de Málaga, do 6 ao 9 de novembro. A viaxe permitiralles, ademais, coñecer a pegada de Picasso na cidade.
Para seleccionar aos galardoados valorouse a orixinalidade, creatividade e motivación dá proposta e a súa viabilidade técnica. A responsable do proxecto, Antía Salgado, subliña a boa acollida que o programa tivo entre o alumnado da Escola. “Foi difícil facer a selección de proxectos debido a calidade e diversidade de ideas presentadas así como o aporte persoal que cada alumna e alumno plasmou na súa proposta”, sinalou.
A listaxe dos 16 proxectos gañadores
● Primeiro Autorretrato de Picasso: reinterpretación con estilo cubista. Serigrafía e cartel.
● Pratos da serie “Catro perfiles enlazados”: modificación dos rostros con motivos animais. Serigrafía
● Guitarrista cego: visión a través do uso de novas tecnoloxías e o seu efecto disociativo. Serigrafía
● Serigrafía de 3 obras da etapa azul
● As señoritas de Avignon: substitución de cabezas por animais doutros cadros de Picasso. Serigrafía en tea.
● Muller ante o espello: reinterpretación sobre a beleza e a fealdade en line art. Serigrafía en tea.
● Nature morte au crâne de boeuf: reinterpretación con iconografía da Coruña. Serigrafía.
● As pombas de Picasso: composición a 2 tintas de obras de Picasso onde as pombas sexan protagonistas. Estampado.
● Libro pop up inspirado no Guernica, montaxe de sombras.
● O espello, reinterpretación desde a visión da Irmandade Prerrafaelista. Impresión en tea.
● Moza fronte a un espello, reinterpretación desde o punto de vista da maternidade. Serigrafía.
● Moza fronte a un espello, reinterpretación desde o punto de vista da anorexia. Serigrafía.
● Raparigo con pipa, revisión ao estilo pop. Serigrafía.
● Guernica e Muller fronte ao espello: paralelismo entre as figuras coetáneas de Picasso e Coco Chanel: arte e moda. A fotografía de moda. Vestido en papel serigrafiado.
● Conexión de Picasso coa Coruña, poster para serigrafía.
● O picador amarelo, reinterpretación xeométrica. Ilustración.
O MACO forma parte da programación de actividades organizadas polo Goberno de Inés Rey ao longo deste ano para conmemorar o 50º aniversario da morte de Picasso, que pasou na Coruña catro anos (1891-1895) decisivos para a súa formación.
A Escola de Arte e Superior de Deseño Pablo Picasso é un centro de ensino público que conta con máis de 400 alumnas e alumnos. Nela pódense cursar Ensinanzas Superiores de Deseño Gráfico e Deseño de Interiores equivalentes a grao universitario, así como as Ensinanzas Profesionais de Dourado, Escultura, Ilustración e Fotografía, xunto cos talleres de Cerámica e Madeira. A EASD Pablo Picasso é herdeira da Escola de Belas Artes que estaba situada no actual IES Eusebio da Guarda, e no próximo ano 2025 celebrará o seu 175º aniversario.
