As invitacións para asistir á actuación só se poden conseguir nas Bibliotecas Municipais da Coruña ao retirar material, tanto de lectura como audiovisual, en lingua galega
Este venres 6 de outubro abriuse o prazo para o repartimento dos pases.
Cada persoa poderá retirar, como máximo, dúas invitacións
O Concello da Coruña, a través da Área de Fomento e Promoción da Cidade, organiza o vindeiro sábado 14 de outubro unha nova edición do AgoraSón de outono, un evento cultural xa clásico destas datas no Centro Sociocultural Ágora, e que nesta ocasión contará con Boyanka Kostova en concerto, ás 21.00 horas.
Esta iniciativa, que se leva a cabo co gallo do Día das Bibliotecas, está promovida polo equipo de profesionais do Servizo de Normalización Lingüística, coa colaboración da Rede de Bibliotecas Municipais da Coruña.
A actuación de Boyanka Kostova, un dúo compostelán que foi pioneiro no xénero do trap en galego, dá continuidade á aposta do Concello polos artistas da nosa terra en citas como o AgoraSón, que en edicións previas contou con Luar na Lubre, as Tanxugueiras e Ruxe Ruxe, entre outros.
Cibrán García e Chicho do Funk ‘Ortiga’, integrantes de Boyanka Kostova, poden presumir dunha traxectoria fulgurante no contexto do circuíto da música urbana galega. Con grandes éxitos como ‘Colacao’, ‘Muinheira de interior’ ou ‘Diego Tristán’, amosan as infinitas referencias e influencias que absorberon ao longo dos anos: a música máis urbana, os ritmos galegos máis tradicionais, as bases electrónicas e unha estética moi apegada aos anos noventa e o comezo do novo milenio.
Segundo AgoraSón deste ano 2023
O AgoraSón lévase a cabo dúas veces ao ano: na primavera —polo Día das Letras Galegas— e no outono —en conmemoración polo Día das Bibliotecas—. O obxectivo desta proposta é dobre: ofrecer un espectáculo musical nun recinto tan especial como o auditorio do Centro Sociocultural Ágora e, en paralelo, levar a cabo un proceso de dinamización lingüística e de promoción da lectura, xa que as invitacións para asistir ao concerto só se poden conseguir nas Bibliotecas Municipais da Coruña ao retirar material, tanto de lectura como audiovisual, en lingua galega.
Deste xeito o Servizo de Normalización Lingüística, coa colaboración das Bibliotecas Municipais, poden ofrecer unha dupla oferta cultural desde o Concello da Coruña.
Como e onde obter os pases
O concerto terá lugar o sábado 14 de outubro, ás 21.00 horas, e só será posible a asistencia entregando a invitación previamente retirada nas Bibliotecas Municipais.
O repartimento destas invitacións comezará este venres 6 de outubro, e cada persoa poderá retirar, como máximo, dúas invitacións. Os convites non están numerados, polo que haberá que chegar puntual para escoller as mellores butacas.
