Pretende ser un complemento da formación ofrecida no programa de especialización en financiamento comunitario
Como continuación do programa de especialización en financiamento comunitario que tivo lugar o pasado mes de setembro en Bruxelas, a Fundación Galicia Europa (FGE) organizou no Centro ABANCA Obra Social de Santiago de Compostela unha xornada sobre elaboración e xestión de proxectos europeos que se desenvolve ao longo do día de hoxe.
Os asistentes, profesionais de entidades públicas e privadas galegas que participaron na primeira edición do programa de financiamento comunitario, recibiron nesta ocasión formación especializada sobre os diferentes pasos a seguir para a elaboración e xestión de proxectos europeos, comezando pola planificación da estratexia de participación, o desenvolvemento da proposta e os seus aspectos financeiros, e rematando coa procura de socios e a planificación do traballo. Tamén se inclúe no programa unha dinámica de grupo na que os asistentes discutiron as súas ideas sobre as respostas innovadoras e de valor engadido que os proxectos deben achegar.
Na liña da primeira parte do programa, o obxectivo do curso é fomentar a participación galega en proxectos europeos, formando responsables de asuntos comunitarios que sexan quen de crear redes entre eles e promovendo a súa colaboración, para deste xeito sacar o maior proveito posible das oportunidades de financiamento que ofrece a Unión Europea.
A Fundación Galicia Europa
A Fundación Galicia Europa (FGE) é unha entidade instrumental do sector público autonómico creada en 1988 co fin de promover todas as accións que propicien o achegamento entre Galicia e Europa. Participada por diversas entidades públicas e privadas galegas, a Fundación está vinculada funcionalmente á Dirección Xeral de Relacións Exteriores e coa EU, da Vicepresidencia e Consellería de Presidencia, Administracións Públicas e Xustiza da Xunta de Galicia. Conta con dúas oficinas: unha en Santiago de Compostela e outra en Bruxelas, formando parte esta última das preto de 300 representacións rexionais establecidas na capital comunitaria.
