Hoxe participamos na xornada anual de limpeza simultánea de cauces convocada por Adega dentro do Proxecto Ríos. Cubrimos varios puntos do Xubia, do que retiramos algúns plásticos, envases e outras cousas (poucas) que non agardabamos atopar nas ribeiras: parte do parachoques dun coche, o gardabarros dun camión, un chupete e incluso un gorro de punto no que xa medraba a herba e outra vexetación.
En total recolléronse uns 50 quilos de refugallos gracias á colaboración dun grupo de 15 persoas voluntarias que se sumaron ao chamamento, que tivo como principal finalidade ser unha acción de concienciación -especialmente para a rapazada, que é o futuro- sobre a importancia de manter limpos os nosos ríos e garantir a continuidade do ciclo da auga.
O percorrido desta mañá serviunos tamén para confirmar que, en canto a limpeza, a saúde do Xubia no tramo urbano de San Sadurniño é moi boa.
