O proxecto, que constituía unha das principais demandas do consello parroquial, terá continuidade nunha segunda fase
Unha vintena de persoas participaron no consello parroquial de Ardaña, no que o alcalde, Evencio Ferrero, e o concelleiro de Participación Veciñal, Daniel Pérez, deron conta dos proxectos en marcha a escoitaron as peticións e demandas da veciñanza. Á xuntanza tamén asistiron os concelleiros do PP Isidro Varela e Javier Calvelo.
Nestes momentos están en marcha as obras de construción de beirarrúas no treito da vía Carballo-Portomouro comprendido entre os quilómetros 3+450 e 4+0,25. A actuación, que ten un orzamento de 175.000 euros, foi adxudicada á empresa local Vázquez y Reino. Ademais dos 575 metros de beirarrúas ao longo da estrada provincial, o proxecto tamén inclúe a creación dun itinerario peonil de acceso ao centro social, con 75 metros de lonxitude, en 30 dos cales levantarase un muro de formigón. Ademais aproveitarase para instalar a rede separativa de augas pluviais. O proxecto complétase coa sinalización horizontal e vertical, a creación de espazos verdes nas zonas situadas xunto aos pasos de peóns e a plantación de árbores.
Por parte das persoas asistentes á xuntanza insistiuse na necesidade de completar as beirarrúas. O alcalde informou nese sentido de que está prevista a execución dunha segunda fase.
Así mesmo, Evencio Ferrero apuntou que está en contratación outra mellora demandada en anteriores consellos, que consiste na pavimentación da vía de acceso ao núcleo de Vivente desde a estrada provincial. Os traballos desenvolveranse ao longo de 150 metros de vía e consistirán na mellora do firme con formigón, a mellora da drenaxe e a instalación de sinalización.
A veciñanza pide que se sigan estendendo servizos como o saneamento ou a mellora da limpeza e pavimentación das vías. Neste sentido, o alcalde sinalou que de cara aos vindeiros anos tamén aposta por reforzar os traballos de roza e explicou que está en marcha un novo contrato de mantemento da rede viaria co que agarda que se atendan as peticións veciñais nese sentido. Aínda que non é competencia municipal, outra preocupación da parroquia é a existencia de zonas sen fibra óptica.
O próximo consello parroquial celebrarase o 26 de outubro no centro social de Artes.
