Di que a sanidade pública do noso país ocupa máis do 40% do total do presuposto do Sergas e que os servizos públicos se incrementaron en todos os hospitais de Galicia
O presidente da Xunta de Galicia, Alberto Núñez Feijóo, subliñou que a sanidade pública galega é unha das mellores das rexións europeas e puxo en valor os últimos avances feitos nos últimos anos neste ámbito, como a incorporación dos novos tratamentos contra a Hepatite C, aos que xa accederon máis de 3.000 pacientes en Galicia.
Nese senso, durante a súa intervención no Pleno da Cámara galega, Feijóo concretou que Galicia é a cuarta Comunidade autónoma con máis tratamentos contra a hepatite C, grazas a un investimento de máis de 75 millóns de euros.
Tamén puxo de manifesto o compromiso da Xunta coa Sanidade Pública ao recordar que nos presupostos previstos para o próximo ano 2016 esta área volve ser a que máis se incrementa, en máis de 100 millóns de euros con respecto ao ano anterior, así como que ao final da lexislatura o 70% dos galegos contará cun hospital ou centro de saúde novo ou ampliado na súa área de influencia.
Na mesma liña, o presidente da Xunta subliñou que a sanidade pública do noso país ocupa máis do 40% do total dos orzamentos públicos e que os servizos públicos se incrementaron en todos os hospitais de Galicia. “Ampliouse o servizo de urxencias do Hospital da Coruña, estase rematando o novo edificio de hospitalización en Ourense e está en fase de licitación a ampliación do Hospital da Mariña lucense”, dixo a modo de exemplos.
Tamén destacou que o Goberno galego investiu 80 millóns de euros en tecnoloxía, o que permitiu adquirir novos aceleradores lineais ou un novo TAC para O Barco de Valdeorras entre outros. Igualmente, fixo referencia á última enquisa do Instituto Galego de Estatística (IGE), que reflicte que a sanidade pública é o recurso público mellor valorados polos galegos. “A sanidade obtén un 5,98 de puntuación, a máxima puntuación” detallou.
Ao repasar os avances sanitarios, Feijóo tamén se referiu a que o novo Hospital Público de Vigo conta agora coas tarifas de aparcadoiro máis reducidas de toda a rede do Servizo Galego de Saúde, ou apuntou que a día de hoxe xa se operaron nese centro 1.700 persoas e se produciron 5.840 altas de hospitalización. Do mesmo xeito, puxo en valor que recentemente se teña alcanzado o transplante número 1.000 de fígado no Complexo Hospitalario da Coruña.
Inicio da recuperación económica
O presidente da Xunta destacou que o Goberno galego tivo desde o primeiro día que tomou posesión unha estratexia económica clara, que pasou por manter o autogoberno, mellorar os servizos públicos, e recuperar os principais indicadores. “Desde o ano 2009 ata o ano 2014 mantivemos a solvencia da Comunidade, no ano 2015 estabilizamos as nosas contas e iniciamos a recuperación e no 2016 fortaleceremos a nosa economía”, dixo, ademais de destacar que “o paro segue sendo 3,4 puntos inferior á media do conxunto do Estado”.
Nese senso, Feijóo apuntou que proseguirá con esa estratexia a medio prazo que recolle catro actuacións concretas cara a: baixar os impostos, reducir o paro, incentivar o emprego e investir para crecer en tecnoloxía e infraestruturas, abastecemento e medio ambiente, coa finalidade de que a recuperación económica se estenda a todas as familias. Ademais anunciou que o Goberno galego presentará este mesmo mes o plan estratéxico da economía galega ata o ano 2020 “para crecer, mellorar o benestar das persoas e impulsar sectores como o primario”.
Por outra banda, o titular da Xunta sinalou que o crecemento que está a experimentar a nosa Comunidade, a un ritmo do 2,1%, está por riba do crecemento de países como Alemaña, Francia e Portugal e que Galicia está a desenvolver un forte investimento en sectores estratéxicos. Como exemplo, referiuse ao sector aeronáutico e avanzou que catro ofertas (as de Airbus, Boeing, Indra e Inaer) competirán na fase final para ser o socio industrial da Xunta de Galicia.
Finalmente, fixo referencia aos bos datos das exportacións que alcanzaron rexistros históricos, “nunca exportamos máis do que levamos exportado nos anos 2013, 2014, 2015” e a enquisa do Instituto Galego de Estatística que reflicte que o 90% dos galegos puntúan con máis dun 5 o seu nivel de satisfacción económica.
