• O novo período de aprendizaxe comezará o venres, 15 de setembro, co Módulo Infantil
• O prazo de matrícula para as persoas de nova incorporación estará aberto ata cubrir as prazas dispoñibles
A Escola de Música do Concello de Ortigueira dá a benvida a un novo curso escolar que promete estar cheo de emoción, ilusión e amor pola música. Co obxectivo de que todo transcorra da forma máis eficaz posible, o inicio da programación farase de forma graduada.
Os primeiros en descubrir este apaixonante mundo serán os integrantes do Módulo Infantil, destinado a nenos e nenas de entre 3 e 6 anos. A ‘Música e movemento’ será a súa particular aventura durante os próximos meses.
As seguintes portas en abrirse serán as das clases de instrumento, onde os estudantes coñecerán as melodías dos seus instrumentos favoritos, e as de Linguaxe Musical, nas que aprenderán a comprender o idioma da música. Ademais, tamén haberá Grupos, nos que o alumnado compartirá a súa paixón musical con outros estudantes.
Novas incorporacións
Aquelas persoas que desexen solicitar unha nova matrícula poden facelo, ata que se cubran as prazas dispoñibles, a través da ligazón habilitada na páxina web da escola de música municipal: https://docs.google.com/forms/d/e/1FAIpQLSeZbrIZ-GRzNUQhl_qu_9wcxvrg6FoHCJH7QWlQB2ou7av8ía/viewform
O alumnado que formase parte no anterior curso non debe preocuparse pola formalización da matrícula, xa que ten a praza reservada.
Desde a Escola de Música mostran o seu entusiasmo e as súas ganas “de comezar este novo curso escolar e compartir a maxia dá música” con todos os seus alumnos e alumnas.
