• Este mércores, 6 de setembro, terá lugar a manifestación ás 19:00 horas, saíndo desde a praza do Parchís ata o CPI Castro Baxoi
O ANPA e a comunidade educativa do CPI Castro Baxoi seguen na loita contra o peche dunha das dúas clases de 4º de infantil e o recorte de persoal do centro. Este mércores, 6 de setembro, convocaron unha marcha ás 19:00 horas, que sairá desde a praza do Parchís ata o propio centro para protestar contra a medida da Xunta.
As familias e o persoal do centro, así como o Concello de Miño, levan desde o mes de xuño tentando revogar a decisión da Xunta de pechar a aula. O motivo polo que a institución autonómica ha tomado esta medida é o número de matrículas en 4º de infantil, xa que actualmente son 20 e o máximo por clase é de 25 alumnos.
Desde o ANPA alegan que Miño leva anos rexistrando un incremento sostido de poboación, en moitos casos de familias con nenos pequenos que chegan ao municipio despois do inicio do curso escolar. Este factor incide directamente no número de matrículas nos centros, que cada ano aumenta ao longo do curso.
