• O Concello e a Xunta acordaron a suspensión temporal do prazo de aprobación definitiva para efectuar primeiro as variacións
O Concello de Abegondo leva a pleno o próximo 14 de setembro a corrección de erros na aprobación provisional do seu Plan Xeral de Ordenación Municipal. Este trámite realízase unha vez detectouse a necesidade de efectuar os cambios e tras acordar coa Xunta de Galicia a suspensión temporal do prazo para a súa aprobación definitiva.
A proposta de plan remitiuse o pasado 20 de xaneiro tras aprobarse o PXOM en pleno en decembro. En abril, observáronse os erros, e os técnicos municipais e autonómicos abordaron o proceso para seguir.
A Xunta abriu a posibilidade de validar o PXOM condicionado a efectuar as variacións, pero o Concello preferiu realizalas primeiro para así obter a luz verde a un documento xa perfectamente validado. Desa forma, solicitouse formalmente á Xunta a suspensión temporal do prazo de resolución de aprobación definitiva do plan, que ascende a 3 meses desde a remisión do mesmo.
Agora, realizadas as correccións por parte do equipo redactor, o pleno deberá aprobar de novo o PXOM de forma provisional. Tras remitilo á Xunta, esta continuará o procedemento para a validación definitiva.
As correccións son principalmente de índole técnica e por cuestións incluídas nas normas técnicas de plan urbanístico de Galicia.
Con este trámite, o Concello confía en contar coa resolución favorable da administración autonómica e lograr así posterior entrada en vigor do Plan, tras a súa publicación no Diario Oficial de Galicia. O goberno municipal estima que se poderá producir antes de que conclúa o ano.
