• A Procesión do Santo, o Entroido de Verán e a Xira Campestre, grandes reclamos dun evento que contará con noites de verbena desde hoxe ata o sábado.
O Concello de Cariño despide desde hoxe, mércores 23, e ata o sábado 26 o mes de agosto ao grande. A localidade cariñesa arrinca hoxe os seus catro días grandes en honra a San Bartolo, patrón local, nos que a música, os actos profanos e relixiosos e a diversión mestúranse para poñer o broche de ouro ao mes estival por excelencia.
Despois de arrincar a xornada de hoxe mércores co lanzamento de 21 bombas de palenque que marcaban o inicio dos festexos, esta noite (22:30 horas) terá lugar a primeira das catro grandes verbenas. Orquéstralas Lume e Cinema abrirán boca coas súas actuacións, antes de que mañá xoves a xornada arrinque ás 11:00 horas, con pasarrúas a cargo da Banda de Gaitas de San Xiao de Trebo, a Danza de Arcos de Cariño e a Banda de Música Eduardo Pondal.
Unha hora despois, ás 12, terá lugar a Misa solemne en honra a San Bartolo e a súa procesión, acompañada polas agrupacións anteriormente citadas. Tras estes actos diúrnos no festivo local, a noite será amenizada por América SL e Foliada D’Ases.
O venres, terceiro día de festa, tomarán a substitución no peche coa Gran Verbena Sinfonía e A Conexión – DJ Party. Previamente, a xornada comezará co habitual pasarrúas ás 11:00 horas, a cargo da Agrupación Tradicional A Casiña dá Música xunto a unha Danza de Arcos de Cariño que repite. De novo, celebrarase unha misa solemne en honra ao santo e a procesión para pechar a mañá. Pola tarde, a partir das 19:00 horas arrincará o Entroido de Verán, con desfile de disfraces acompañados por Batería do Cariño e Comparsa Os Infieis. O desenlace do desfile será na Praza Roxa, onde continuará a música ata altas horas.
Por último, para pechar os festexos, ás 13:30 horas do sábado celebrarase a tradicional Xira Campestre en La Solana, onde os veciños acudirán para gozar dunha comida na natureza en compañía. A Xira será amenizada polo Dúo Orazal, que poñerá o prólogo á gran verbena dos Españois e DJ Party.
