As instalacións estarán abertas ao público desde mañá mércores 12
A obra incluíu a creación dunha praza peonil e a mellora da accesibilidade na contorna
O Concello da Coruña, a través da súa Concellaría de Infraestruturas, rematou a construción dun skatepark e unha pista multideporte na praza de José Toubes Pego, no barrio de Catro Camiños. Esta nova infraestrutura situarase baixo o viaduto da avenida de Alfonso Molina. Esta obra inclúe, ademais, a urbanización do conxunto da praza e a creación dun novo paso de peóns. A alcaldesa da Coruña, Inés Rey, visitou esta mañá as novas instalacións que estarán abertas ao público desde mañá, acompañada polo concelleiro da área de Economía e Planificación Urbana, José Manuel Lage, o concelleiro de Urbanismo, Rehabilitación e Vivenda, Francisco Díaz Gallego e a concelleira de Innovación, Mobilidade e Infraestruturas, Nereida Canosa.
O skatepark e a pista quedan integradas na contorna mediante a adecuación do firme de todo o conxunto. “Continuamos impulsando espazos para os nosos mozos e mozas na cidade e, ademais, dotamos aos barrios de máis instalacións deportivas para favorecer hábitos de vida saudables”, sinalou Inés Rey.
A zona de actuación abrangueu unha superficie de 1.504 metros cadrados. O skatepark ocupa uns 400 metros cadrados, mentres que a pista deportiva, que tamén ten bancadas, ocupa 361 metros cadrados. Completa o espazo a praza peonil, de 176 metros cadrados. O espazo restante corresponde a beirarrúas, zona axardinada e un novo paso peonil.
O skatepark está pensado para que todas as persoas, con e sen experiencia, poidan practicar este deporte. Esta zona dispón de elementos que permiten mellorar progresivamente a técnica aos menos expertos. Pola súa banda, a pista multideporte está adaptada á práctica do baloncesto, con seis canastras que permiten dividir a cancha en varios terreos de xogo.
Un dos obxectivos desta actuación foi a mellora da accesibilidade na zona. Reformáronse as beirarrúas e habilitouse un novo paso peonil na rúa Fernando Rey con rede semafórica.
Creouse tamén unha praza peonil que actuará como zona de tránsito e encontro, con espazos verdes e bancos.
O proxecto completa a reurbanización da praza José Toubes, na que se atopa o renovado espazo do Remanso. Na contorna tamén se levou a cabo a reurbanización completa de Fernández-Latorre, con carril bici e novas árbores.
