Evencio Ferrero agradece o traballo desenvolvido polos sete concelleiros e concelleiras que abandonan a corporación
Sete dos actuais integrantes da corporación municipal de Carballo non formarán parte do próximo pleno. Milagros Lantes e Marcos Trigo, do BNG; Antonio Domínguez e Paula Nogueira, do PP; César Varela, do PSOE, e José Bello Pallas e Andrés Eirís, de Terra Galega, abandonan a primeira liña da política municipal ben por non ter sido elixidos ou ben por non terse presentado ás recentes eleccións.
Hoxe, coa excepción de Bello Pallas, que non puido asistir á sesión, víronse as caras por última vez no mandato que remata para aprobar as actas pendentes. O alcalde, Evencio Ferrero, aproveitou a xuntanza para agradecerlles o traballo desenvolvido e desexarlles o mellor na nova etapa que inician. “Sempre é un pracer representar aos veciños e veciñas de Carballo, e nese sentido o meu agradecemento e toda a estima persoal a Paula, Antonio, Andrés, Pallas, César, e permitídeme que sexa de maneira especial con Marcos Trigo e especialísima con Milagros Lantes”, declarou o alcalde, ademais de animar a todos os corporativos a seguir mantendo a relación e a seguir traballando por Carballo, “que é o que nos gusta, e que é onde decidimos vivir e desfrutar. Que teñades toda a felicidade nos vosos fogares, e que esta experiencia sexa imborrable para todos”.
As concelleiras e os concelleiros que abandonan o salón de plenos tamén quixeron despedirse. “Levo moitos anos sendo concelleira, pero aínda sen ser concelleira hai vida política e pódese facer moito traballo sen vir a este salón de plenos, que é moi importante e é unha experiencia moi positiva, da que se aprende moito”, manifestou Milagros Lantes, que expresou os seus mellores desexos para os compañeiros e as compañeiras que continuarán formando parte da corporación, animounos a seguir traballando por Carballo e “que as relacións persoais primen por riba das rivalidades políticas”.
O seu compañeiro Marcos Trigo desexou, no mesmo sentido, que se manteña “o respecto e a cordialidade que hai entre os grupos máis alá das diferenzas políticas, e que este salón
Tanto Paula Nogueira coma Antonio Domínguez destacaron a aprendizaxe que supón formar parte da corporación e a diferenza que hai entre ver as institucións dende fóra ou dende dentro. “Culturalmente foi espectacular saber como funciona o Concello, de onde veñen os fondos, saber que significan as siglas, e levo esta aprendizaxe. Noutras facetas da miña vida sempre digo que a formación é unha das bandeiras que representan a unha persoa, e isto axudoume a formarme noutros ámbitos da miña vida persoal nos que non tivera oportunidade ata este momento. Todo o que levo é positivo”, sinalou a concelleira do PP.
O socialista César Varela asegurou marchar “moi contento” pola experiencia adquirida, pero deixa a porta aberta. Ao igual que a súa compañeira Mari Carmen Vila, felicitou ao BNG polos bos resultados acadados, así como ao PP, e animou aos compañeiros e compañeiras que permanecerán na corporación “a seguir facendo o que se debe, que é traballar e cumprir”.
Andrés Eirís asegurou que nunca pensara en formar parte da corporación municipal durante tanto tempo. “Despois de oito anos é tempo de pechar unha etapa, na que é verdade que aprendín moito, gustoume moito, pero vaime custar moi pouco adaptarme a non ser político, porque penso que todo o que tiña que dicir díxeno, e sempre dixen o que pensaba e intentado que isto fose o mellor posible”, engadiu o portavoz de Terra Galega, partido que desaparece da corporación tras non concorrer ás eleccións.
