• Serán 32 grupos os que se dean cita a tarde do domingo 11 de xuño no Paseo do Balneario desde as 18:00 horas para bailar xuntos.
• Participarán unha ducia de asociacións: A.C. O Castro, A.C. Xacarandaina, CEIP Ponte dos Brozos, CEIP Arteixo, CEIP Galán, A.C. Nemeth, Sociedade Recreativa San Xoán de Calo, Agrupación Folclórica Folliñas, A.C. Santa María de Toras, A.C.D. Garrulaxe, Grupo de Baile e Gaitas Santaia e a organizadora A.X. Xiradela.
Na Asociación Xuvenil Xiradela xa teñen todo listo para recibir en Arteixo este domingo a 282 persoas dispostas a sumarse ao seu Día da Muiñeira. En total serán 12 asociacións e 32 grupos os que dancen ao son da peza elixida este ano que é ‘A Muiñeira dos Queixas’.
Este ano fai un número redondo. O Día da Muiñeira que organiza a A.X. Xiradela alcanza a súa 35ª edición en 2023. Ano tras ano en terras de Arteixo xúntanse bailaríns chegados de diferentes puntos da comarca. Este ano duplícase o número de asociacións con respecto ao 2022 e con iso tamén o número de participantes.
En concreto os grupos que se suman ao XXXV Día da Muiñeira de Arteixo son doce: A.C. Ou Castro (Miño), A.C. Xacarandaina (A Coruña), CEIP Ponte dos Brozos (Arteixo), CEIP Arteixo (Arteixo), CEIP Galán (Arteixo), A.C. Nemeth (Carballo), Sociedade Recreativa San Xoán de Calo (Teo), Agrupación Folclórica Folliñas (Oleiros), A.C. Santa María de Toras (A Laracha), A.C.D. Garrulaxe (Cecebre – Cambre), Grupo de Baile e Gaitas Santaia (Oleiros), así como o organizador A.X. Xiradela (Arteixo).
A cita terá lugar o vindeiro domingo 11 de xuño ás 18:00 horas no Paseo do Balneario. No recinto iranse colocando os diferentes grupos, que terán reservado un espazo concreto, un cadrado no que desenvolverán logo a súa proposta para bailar ‘A Muiñeira dos Queixas’. Cada un deles é libre de elixir os puntos e voltas que integrarán na súa posta en escena.
A muiñeira elixida recolleuse en Cerceda
Como é habitual no Día da Muiñeira a peza seleccionada, nesta ocasión ‘A Muiñeira dos Queixas’, bailarase tres veces con descansos entre cada representación. Este tema recolleuse ao cuarteto ‘Os Queixas’ da parroquia de Queixas en Cerceda. Este grupo estaba liderado polo gaiteiro Manuel Gende.
Nesta cita dominical, organizada pola A.X. Xiradela colaboran o Concello de Arteixo, Vegalsa, Comercial Sánchez Vados, así como a Policía local e Protección Civil do municipio arteixán.
Desde 1987, cada mes de xuño
En anos anteriores o Día da Muiñeira de Arteixo congregou a numerosas persoas entre bailaríns e público superándose nalgunha edición as 1.000 persoas gozando da música e o baile tradicional.
Desde xuño de 1987 o mes de xuño a A.X. Xiradela propón esta cita cultural e social na que se busca realzar a peza máis emblemática do noso folclore: a muiñeira.
Como en ocasións previas, o acto abrirase cun desfile das asociacións participantes que transcorrerá polo paseo fluvial desde o Pazo dos Deportes ata o Paseo do Balneario. Chegados alí, xa cos grupos de baile nos seus respectivos lugares, o grupo de gaitas da A.X. Xiradela interpretará a peza unha vez para que os bailaríns poidan familiarizarse con ela. Posteriormente xa se procederá a bailar ‘A Muiñeira dos Queixas’ en tres ocasións con descansos entre cada unha delas.
Ao final da cita as asociacións participantes recibirán un recordo pola súa intervención no XXXV Día da Muiñeira. Tamén se repartirá unha merenda aos bailaríns.
Ademais da posta en valor da muiñeira, ritmo chave na tradición musical do folclore galego, a cita supón unha ocasión para a convivencia das diferentes agrupacións que toman parte na cita que gozan xuntas de música e baile tradicional.
QUEN SOMOS
A Asociación Xuvenil Xiradela, radicada no municipio de Arteixo (A Coruña), nace no ano 1982 co obxectivo de recuperar o noso folclore e gozar do tempo libre, así como de colaborar con outras asociacións ou entidades que nos permiten, por unha banda difundir o noso traballo, e por outro, axudar a promover a socialización dos mozos con xente doutras asociacións.
Esta asociación supera os 40 anos de existencia. Comezou impartindo baile tradicional, e logo ampliou a oferta ás actividades de pandeireta e canto tradicional, gaita e percusión, entre outras.
A partir do ano 1984 créase un grupo de investigación para a recollida de música, cancións, literatura oral, costumes, bailes e traxes dos nosos antepasados, a súa recuperación e divulgación, pretendendo ser o máis fieis posible á máis pura tradición galega.
A A.X. Xiradela celebra anualmente un concurso de música tradicional e, desde o ano 1987, celebra o Día da Muiñeira en Arteixo no mes de xuño. Trátase dunha exhibición na rúa de bailaríns da peza máis emblemática do noso folclore.
