— Subliña que estará en marcha en xullo e que vai ser o centro con maior capacidade nesta ruta ao contar con 60 prazas
— O primeiro albergue público da cidade de Ferrol vai elevar a 76 os centros da rede autonómica, sete deles no Camiño Inglés
— Destaca que o Camiño de Santiago “é o mascarón de proa do turismo e a marca Galicia”
— O Goberno galego traballa para converter esta ruta xacobea nun referente de turismo familiar e ‘pet friendly’
— Resalta que o número de viaxeiros chegados a Galicia aumentou un 19 % no primeiro cuatrimestre de ano e que se bateu récord histórico de pernoctacións
O presidente da Xunta, Alfonso Rueda, destacou hoxe que o novo albergue público de peregrinos de Ferrol vai consolidar e impulsar o Camiño Inglés entre os peregrinos que se dirixen a Compostela. O titular do Goberno galego destacou que esta ruta que parte do mar “está a crecer moito” e xa é a cuarta máis utilizada, só por detrás do Camiño Francés e as dúas variantes portuguesas.
O primeiro albergue público da cidade de Ferrol, que comezará a funcionar en xullo, está ubicado na antiga hospedería da Casa do Mar. Rueda resaltou que vai ser o albergue con maior capacidade de todo o Camiño Inglés -ao dispoñer de 60 prazas- e contará cunhas instalacións que garantan a accesibilidade e a eficiencia enerxética.
O presidente subliñou que este albergue vai servir “como elemento tractor” para que xurdan outro tipo de iniciativas vencelladas ao Camiño nesta comarca e darlle un pulo ao sector turístico nesta zona. “O Camiño Inglés está medrando moito e aínda lle queda moito percorrido. É unha fonte de oportunidades”, indicou.
Coa apertura deste albergue, a rede pública galega contará con 76 centros de acollida aos peregrinos, dos que sete se atopan no Camiño Inglés. Rueda resaltou a importancia do Camiño de Santiago non conxunto do turismo da comunidade. “O turismo en Galicia é moito máis que o Camiño de Santiago, pero o Camiño é o mascarón de proa do turismo e da ‘marca Galicia’”, destacou.
Por iso, a Xunta destina 125 millóns de euros de orzamento ao Plan Director do Camiño de Santiago 2022-2027. Case a metade do orzamento vai dirixido a actuacións de mantemento e mellora das sendas e os albergues.
Ademais, o Goberno autonómico aposta por impulsar o Camiño Inglés como un referente do turismo familiar e para convertelo en Camiño ‘Pet Friendly’. A Xunta traballa na adaptación dos últimos 40 quilómetros da ruta para poder facelos con nenos (ao dividilos en etapas de 8 quilómetros de media) e vai modificar a sinalización e engadir zonas de lecer infantís e servizos para as familias en toda a ruta.
Novos datos históricos en turismo
Os últimos datos do sector turístico -correspondentes ao primeiro cuatrimestre do ano- seguen a demostrar que Galicia segue a consolidarse como destino turístico seguro e sostible. Entre xaneiro e abril visitaron á comunidade galega un total de 1,3 millóns de turistas, o que supón un 19 % máis que no mesmo período de 2022. Ademais, rexistrouse récord histórico nun primeiro cuatrimestre de ano de noites aloxadas ao superar as 2,3 millóns e tamén se acadaron máximos históricos de turistas estranxeiros ao lograr 586.000 pernoctacións.
