O concelleiro de Urbanismo, Francisco Díaz Gallego, puxo en valor este logro, “xa que para definir o Plan Director foi fundamental a participación e implicación das veciñas e veciños do barrio”
Este xoves celebrouse o acto de entrega dos premios europeos Architectural Heritage Intervention, unha iniciativa bienal promovida pola plataforma barcelonesa AHI, o Colegio de Arquitectos de Cataluña, o Ayuntamiento de Barcelona e a Área Metropolitana de Barcelona.
Na súa sexta edición, á que se presentaron 241 proxectos de despachos de arquitectura de 28 países europeos, otorgouse unha mención de nova creación, a ‘New European Bauhaus Mention’, ao Plan Director de Rehabilitación Integrada do Barrio das Flores, un proxecto levado a cabo polo estudio Territoris XLM e BCQ Arquitectura.
O xurado puxo en valor o carácter “inspirador” do deseño, “o aspecto máis valioso dentro do carácter integral e social da proposta, que aborda unha problemática estendida por toda Europa, propoñendo solucións innovadoras que favorezcan a un sector da poboación, o da xente máis maior, que merece unha atención especial”.
Ademais, o proxecto do Plan Director de Rehabilitación Integrada do Barrio das Flores tamén resultou finalista na categoría de premios ‘Urban Planning’.
O concelleiro de Urbanismo, Vivenda, Infraestruturas e Mobilidade, Francisco Díaz Gallego, puxo en valor este recoñecemento, “xa que para definir o Plan Director foi fundamental a participación e implicación das veciñas e veciños do barrio, traballando e definindo posibles accións de mellora contando coas suxerencias da cidadanía”.
A este respecto, en novembro de 2021 iniciándose unha serie de talleres e reunións coa veciñanza do Barrio das Flores para que os propios residentes aportasen ideas susceptibles de ser integradas no Plan Director, definido en xullo do ano pasado.
A declaración do Barrio das Flores como Entorno Residencial de Rehabilitación
Programado (ERRP)
Díaz Gallego lembrou, ademais, que en outubro de 2022 aprobouse en Xunta de Goberno Local a declaración do Barrio das Flores como Entorno Residencial de Rehabilitación Programado (ERRP), categoría coa que se regulan os programas de axuda en materia de rehabilitación residencial e vivenda social do Plan de Recuperación, Transformación e Resiliencia, e que permitiu que o Goberno de Inés Rey captase 6 millóns de euros en fondos Next Generation en novembro do ano pasado, co obxectivo de acometer melloras en catro ERRP da cidade. Entre eles, o do Barrio das Flores.
Neste enclave, e grazas a esta partida orzamentaria, levarase a cabo unha ambiciosa mellora do parque de vivendas no Barrio das Flores, así como da súa eficiencia enerxética.
Ademais, está previsto executar un plan de mellora da accesibilidade no itinerario peonil entre a praza dos Freixos e a rúa dos Castiñeiros, no sector norte do barrio.
