A gran novidade será a inclusión dunha actuación gratuíta de Sharrie Williams Band o martes 11 na praza de Azcárraga
O conselleiro delegado do IMCE, Gonzalo Castro, presentou hoxe en María Pita a programación da novena edición do Festival Internacional +QJazz, que se desenvolverá en salas e auditorios da cidade entre o 10 e o 15 de xullo. As entradas para o ciclo pódense adquirir en Ataquilla, no quiosco da praza de Ourense e no despacho de billetes do Teatro Colón.
O ciclo albergará a grandes figuras do panorama jazzístico internacional, nacional eautonómico nunha sucesión de concertos que comezarán coa actuación de Yellowjackets o luns 10 de xullo no Teatro Colón, onde conmemorarán o seu 50 aniversario como formación.
As entradas para o concerto custarán 22 euros en venda anticipada e 25 euros o mesmo día no despacho de billetes.
A gran novidade será a actuación gratuíta de Sharrie Williams Band o martes 11 de xullo na praza de Azcárraga. “É unha mostra máis do compromiso do Goberno de Inés Rey coa difusión da cultura, buscando espazos únicos para a programación de concertos singulares”, indicou Gonzalo Castro.
As seguintes tres noites as salas de concertos da cidade serán as protagonistas. O mércores 12 será o turno de Steve Turre no Garufa Club (o custo das entradas irá de 12 a 15 euros), mentres que o xoves 13 Michael Olivera Trío actuarán no Filloa Jazz Club (entradas de 9 a 12 euros) e o venres 14 Red house Revival estarán na Sala Mardi Gras (entradas de 9 a 12 euros).
Castro destacou a gran aposta pola cultura levada a cabo polo Goberno de Inés Rey e a inclusión das salas e recintos populares da cidade na súa oferta cultural. “Non hai mellor escenario para promover a cultura na Coruña que ofrecer actividades atractivas, diferentes e, neste caso, co valor engadido de enriquecer a programación das nosas salas de concertos”, apuntou. Pechará o ciclo a tradicional actuación da Garufa Blue Devils Big Band, con artista convidado, o sábado 15 no Garufa Club (o custo das entradas será de 20 euros).
Coa programación do Festival +QJazz, o Goberno municipal continúa avanzando no seu obxectivo de situar A Coruña como cidade de referencia en eventos musicais, atraendo espectáculos e encontros de proxección internacional e nacional. “Con este elenco, o festival volve lograr unha edición máis o seu obxectivo: poñer a cidade herculina no escaparate dos grandes festivais de jazz e ampliar o seu espectro musical”, sinalou Castro.
