O mandatario galego participou na conferencia do Club Siglo XXI
O responsable do Goberno galego, Alberto Núñez Feijóo, destacou que o patriotismo hai que avalialo pola súa xestión e integridade.
Así o manifestou na súa intervención no Club Siglo XXI, onde fixo referencia ao golpe aos dereitos democráticos que algúns representantes do Estado en Cataluña tentaron perpetrar este luns.
Ademais, o titular da Xunta subliñou que non cabe maior provocación cara aos cidadáns de Cataluña que a de arrebatarlles os seus dereitos consagrados legalmente e afirmou non compartir que o deber democrático de esixir o cumprimento da lei poida resultar ofensivo ou provocador.
Nese senso, Feijóo sinalou que os secesionistas pretenden camuflar os seus erros de xestión cunha “fuxida cara a ningunha parte” e que a clase política independentista retrocedeu a aqueles tempos nos que primaba a intransixencia e intolerancia, que nada se asemellan á normalidade que impera na maioría da sociedade española agora.
Fíxoo despois de repasar as difíciles encrucilladas ás que se tivo que enfrontar esta Nación desde a inauguración formal da constitución en 1978. Entre elas a propia Transición democrática, o terrorismo cruel e persistente de ETA ou o intento de golpe de Estado do 23 de febreiro de 1981, ocasións todas elas nas que a sociedade española soubo diferenciar entre a excepción e a norma e ofrecer unha resposta proporcional e libre de suspicacias.
Nese momento da intervención, o mandatario galego recordou tamén que a nosa democracia está asentada nunhas raíces profundas e sinalou que este novo desafío á democracia non se apoia en tanques nin tampouco os terá en fronte. Pretende aproveitarse desas garantías democráticas da España constitucional para liquidala desafiando á lei, pero que “no seu intento fracasado de golpear ao Estado o que fan é golpearse a si mesmos”.
Para a consecución deste desafío que se presenta, Feijóo apelou ao “sentidiño” do que falaba Fernández Albor que nos permitiu aos galegos construír unha sociedade que non necesita atormentarse coa súa identidade, senón gozar de varias con absoluta normalidade. O noso patriotismo emerxe da idea do ilustrado Padre Feijoo, proseguiu, que o situaba sempre no respecto á lei.
Para concluír, o presidente da Xunta, que se mostrou orgulloso de representar a unha nacionalidade histórica, destacou que a autonomía non ocasionou nin ocasiona problemas, senón que os resolve. “Galicia é a proba de que o autogoberno pode contribuír a unha xestión eficaz”. O autogoberno foi unha ferramenta decisiva para capear a crise e iniciar a recuperación e foinos útil para estar presentes e ter máis forza no mundo globalizado e para ser unha comunidade máis estable, engadiu.
