Os “odios tribais” entre os membros dos sucesivos gobernos impediron resolver os asuntos máis relevantes do municipio.*
Para a líder do Partido Popular Esperanza Arias, os 8 anos transcorridos con distintas combinacións de partidos de esquerdas ao mando da institución municipal non serviron, por incapacidade manifesta e rifas dos seus titulares, para resolver os problemas que máis preocupan aos sadenses.
“A pista de patinaxe, a piscina municipal, a terraza, o vial de Sada e os seus contornos, os problemas de seguridade cidadá, os de mantemento de infraestruturas públicas, son parte dunha longa lista de manifestacións da incompetencia e a deslealdade entre as distintas faccións que veñen compoñendo o poder municipal en Sada” asegurou a candidata do Partido Popular.
A xuízo do Partido Popular estes seis meses do novo goberno só serviron para poñer de manifesto as tensións e odios “tribais” que se vivían nos anteriores gobernos
” Resulta moi curioso observar ultimamente como se desmarcan uns e outros de tan penosos resultados cando pertencían aos centros de decisión” engadiu a candidata popular.
“Resolver a posta en marcha con garantías e continuidade da piscina, dispoñer do uso e goce polos cidadáns do municipio da Terraza, determinar a execución da pista de patinaxe para adestramento do noso club, son problemas que, en mans dun bo xestor, requiren unicamente ter as ideas claras e traballo serio” sentenciou.
O Partido Popular non ten dúbidas de que será un goberno municipal encabezado por Esperanza Arias o que poñerá fin a toda esta sucesión de dislates.
