Únense a Scorpions e Marea con concertos durante o mes de xullo entre os peiraos de Batería e Calvo Sotelo
Rubén Blades e ZAZ completan as actuacións que se celebrarán durante o mes de xullo no porto dentro do Coruña Sounds, o novo evento musical do verán que se celebrará nos peiraos de Batería e Calvo Sotelo. Únense a Scorpions e Marea, cuxos concertos xa estaban anunciados e as entradas están á venda a través de Ataquilla e dos puntos de venda física habituais.
O Concello da Coruña crea esta nova iniciativa musical co obxectivo de abrir o porto á cidadanía e dinamizar a oferta cultural e musical do verán coruñés. Durante o mes de xullo pasarán polo peirao agrupacións nacionais e internacionais de gran prestixio e de diferentes estilos musicais.
O primeiro dos concertos será o de Scorpions. A formación alemá é a banda máis lonxeva en activo de ‘hard rock’ e ‘metal’ e fará parada na Coruña dentro da súa xira ‘Rock Believer Tour’. Será o seu único concerto do ano no norte do país e estarán acompañados no escenario como teloneiros pola banda Thundermother.
O xoves 20 de xullo será a quenda de Rubén Blades, o máximo expoñente da salsa a nivel mundial, xunto á Big Band de Roberto Delgado, composta por case 20 músicos. O panameño conta cunha carreira sobresaínte de máis de cincuenta anos, nos que colleitou numerosos éxitos e recoñecementos. É considerado un dos máis grandes artistas latinos do século XX e conta entre os seus recoñecementos con 10 premios Grammy e outros 13 premios Grammy Latinos. As entradas para o seu concerto costarán 35 euros.
O sábado 22 de xullo actuará no porto a banda Marea, un referente do rock nacional que estará acompañado de Bocanada. A formación liderada por Kutxi Romero regresa á Coruña tras encher o Coliseum no 2019 para presentar o seu novo disco ‘Los Potros del Tiempo’.
Por último, pechará este ciclo de actuacións musicais no porto ZAZ, o gran fenómeno da música en francés, o vindeiro luns 31 de xullo, dentro da súa xira ‘Organique Tour’. O seu pop enche recintos en toda Europa e actuará por primeira vez na cidade. As entradas para a súa actuación costarán 25 euros.
As actuacións no porto coruñés completaranse a fin de semana do 28 e 29 de xullo coa celebración do Morriña Festival, que contará nesta edición coa presenza de destacados artistas internacionais de diferentes xéneros como Nicky Jam ou Two Door Cinema Club.
