As 17 actuacións financiadas mellorarán o servizo aos cidadáns cunha mellora integral da accesibilidade dos barrios, a humanización de diferentes rúas e a ampliación do servizo de BiciCoruña
O Concello da Coruña vén de coñecer no día de hoxe a concesión de 9,1 millóns de euros na segunda convocatoria dos fondos europeos Next Generation. A alcaldesa, Inés Rey, informou da resolución destas axudas, que se complementarán cunha achega municipal de 3,1 millóns de euros, o que permitirá acometer diferentes melloras na cidade por un importe total de 12,3 millóns de euros.
O Concello acadou a cifra máxima de axudas solicitadas ao Ministerio de Transportes, Movilidad y Agenda Urbana e A Coruña é a primeira cidade do país en investimento por habitante entre as que acadaron maior financiamento cunha media de máis de 37 euros por persoa. Ademais, o Concello foi a segunda administración mellor valorada da convocatoria a nivel nacional e a primeira a nivel galego, e é o undécimo en termos totais de contía recibida, segundo o informe de valoración emitido polo ministerio.
Esta achega de 9,1 millóns súmase aos 44 millóns obtidos neste mandato de distintas Administracións e xa están executados ou en execución.
As actuacións comezarán a executarse nos próximos meses e deberán estar rematadas no ano 2025. O Concello presentou a esta convocatoria 17 proxectos para os diferentes barrios da cidade.
Os 17 proxectos cofinanciados
Mellora de accesibilidade na rúa Castaños
Esta actuación conta cun orzamento de 200.000 euros e consistirá na creación dunha rampla que permita que esta rúa do Barrio das Flores e o acceso ás vivendas sexa 100% accesible.
A actuación contempla tamén a creación dun novo acceso desde a avenida de Monelos e se mellorará tamén o acceso ás vivendas.
Mellora de accesibilidade ao Centro Oncolóxico
Esta actuación busca mellorar os accesos peonís e en coche ao Centro Oncolóxico.
Instalarase un pavimento accesible para a circulación peonil e melloraranse as condicións de seguridade para as persoas que accedan en vehículo privado e para ambulancias. Ademais, crearase unha parada de taxis que dará servizo ao hospital e renovarase o sistema de iluminación. Esta obra terá un orzamento de 411.000 euros
Creación de escaleiras mecánicas en Adelaida Muro e Pintor Villar Chao
Trátanse de melloras de accesibilidade nas dúas rúas, onde a día de hoxe hai varios tramos de escaleiras. Os proxectos contemplan a instalación de novas escaleiras mecánicas, que suporán unha mellora no tránsito de viandantes. Tamén se actuará sobre o pavimento e se dotará a ambas actuacións de novo mobiliario urbano. O orzamento é de 1,1 millóns de euros no caso de Adelaida Muro e de 433.000 no caso de Pintor Villar Chao.
Reurbanización da rampla do Matadoiro
Esta actuación consistirá na ampliación das zonas peonís, a renovación de diferentes servizos municipais, a plantación de novas zonas verdes e a instalación de mobiliario urbano.
O seu orzamento é de 548.000 euros. O obxectivo é mellorar o tránsito peonil e aproveitar o máximo o espazo para o seu uso pola cidadanía.
Melloras de accesibilidade entre Peruleiro e a rúa Barcelona
Esta actuación permitirá adaptar diferentes rúas desta zona á normativa actual de accesibilidade. A actuación comprende a totalidade das rúas Fanny Garrido e Julia Minguillón.
Tamén se reurbanizarán varios tramos de Manuel Deschamps, Almirante Mourelle e Páramo.
A actuación vai na liña de outras levadas a cabo na cidade en materia de accesibilidade e terá un orzamento de máis de 600.000 euros.
Melloras de accesibilidade na cidade para mobilidade reducida
Esta actuación conxunta en tres puntos da cidade xa foi executada nos últimos meses e, agora, o Concello recuperará o investido a través destes fondos Next Generation. Trátase dunha das propostas gañadoras dos Orzamentos Participativos. No Paseo das Pontes, no seu cruzamento coa avenida de Finisterre, instalouse unha nova parada de bus e melloráronse as beirarrúas. Por outra banda, instaláronse novos pasos peonís en Maxistrado Manuel Artime e na avenida da Concordia. O orzamento total desta actuación xa executada foi de 208.000 euros.
Reurbanización das rúas San Mateo e Padre Sarmiento
Esta actuación suporá a creación dunha plataforma única na rúa e permitirá incrementar as zonas verdes e manter a tendencia dos elementos que caracterizan ao parque de Santa Margarida.A actuación suporá un investimento de 833.000 euros.
Glorietas na avenida de Finisterre
Inclúense nesta convocatoria as dúas glorietas que temos plantexadas na Grela, na avenida de Finisterre. Como xa saben, atoparanse nos cruzamentos das rúas Gambrinus e Gutenberg. O orzamento de cada unha das actuación será de 390.000 euros. O obxectivo é mellorar a seguridade vial, ademais de mellorar tamén a fluidez do tráfico na contorna do polígono industrial.
Reurbanización de Pla y Cancela
Melloraranse as condicións de accesibilidade en Pla y Cancela. Esta actuación
complementará á xa executada na glorieta entre a rolda de Nelle e a avenida de Arteixo.
Ampliaranse as beirarrúas e crearanse novas zonas verdes. O orzamento da actuación é de
1,1 millóns de euros.
Reordenación do cruzamento entre a rúa Bergondo e a avenida Casanova de Eirís
Implantarase unha glorieta e melloraranse as condicións de accesibilidade. Tamén se actuará sobre o pavimento de toda a contorna e plantaranse novas árbores. Esta actuación terá un orzamento de 193.000 euros.
Urbanización da avenida da Sardiñeira
Investimento de 1,8 millóns na urbanización desta avenida. A modificación máis notoria será a creación dunha glorieta que conectará a Sardiñeira coa avenida de Arteixo. A actuación contempla outras novidades para a avenida, como un carril bici bidireccional, a implantación do sentido único na rúa Europa e a modificación da intersección coa rolda de Outeiro. Os traballos complementarán os que se realizan para a creación da estación intermodal.
Contornas escolares seguros
Outra actuación deste programa, nesta ocasión na praza Pintor Laxeiro. Renovarase o pavimento deteriorado, reorganizaranse as diferentes seccións da rúa, sanearase e incrementaranse as zonas verdes e, en definitiva, levarase a cabo unha mellora estética xeral da praza. O orzamento ascende a 400.000 euros.
Reforzo da sinalización de pasos de peóns
Actuación global en toda a cidade que consistirá na instalación de novas sinais para os pasos de peóns. Serán sinais luminosas con placas solares. O obxectivo é mellorar a seguridade viaria e o orzamento será de 280.000 euros.
Mellora de accesibilidade nas paradas de autobús
Adaptaranse 11 novas paradas as necesidades de todas as persoas usuarias. A maioría estarán situadas na zona dos Castros, Castrillón e Eirís, pero haberá tamén melloras en Monte Alto ou Catro Camiños. A actuación ten un orzamento de 694.000 euros.
Ampliación de BiciCoruña
Por último, investiranse 2,5 millóns de euros na ampliación do servizo de BiciCoruña. Esta é unha ampliación das 55 estacións que temos previstas na actualidade e que xa estamos a instalar en todos os barros.
