— O conselleiro entrega os Premios Boas Prácticas de Educación Inclusiva a centros de toda a Comunidade, correspondentes ás tres últimas edicións
— Aposta pola colaboración para construír unha escola plenamente inclusiva “na que cada alumno vexa fortalecidos os seus talentos e as súas capacidades”
O conselleiro de Cultura, Educación, FP e Universidades, Román Rodríguez, entregou hoxe os Premios Boas Prácticas de Educación Inclusiva a centros de toda Galicia polo traballo desenvolvido en prol da atención á diversidade e da inclusión educativa. Un recoñecemento que ten por obxectivo promover unha escola que garanta o estímulo das capacidades de todo o alumnado e contribúa a creación de contornas e culturas inclusivas.
Na súa intervención, o titular o departamento educativo da Xunta salientou a calidade das iniciativas premiadas, “apostas polo teatro como estratexia inclusiva, obradoiros para o reforzo competencial dos profesionais educativos ou creación de glosarios con linguaxe de signos para facilitar a integración académica, proxectos impresionantes e beneficiosos non só para o alumnado, senón tamén para os propios docentes”, explicou.
Neste sentido, puxo en valor o sistema de atención á diversidade do ensino galego que, cun 94% do alumnado con necesidades específicas de atención educativa integrado en centros ordinarios, é o máis inclusivo de todo o Estado, tal e como reflicten os últimos datos publicados polo Ministerio de Educación a semana pasada.
“O piar deste modelo de inclusión educativa son os docentes e os arredor de 4.000 profesionais de atención á diversidade, a vosa implicación é o factor básico para o desenvolvemento das capacidades do alumnado con necesidades especiais, polo que é necesario agradecervos o voso traballo”, destacou o conselleiro, que puxo tamén de relevancia o papel colaborador no ensino das entidades comprometidas coa atención á diversidade.
“Para a educación do presente e para a educación do futuro, é fundamental a cooperación de cara a sustentar unha folla de ruta común que permita construír unha escola plenamente inclusiva, na que cada alumno vexa fortalecidos os seus talentos e as súas capacidades coas ferramentas apropiadas”, rematou.
Centros galardoados
A convocatoria establece dúas categorías. Na primeira delas, a A, recoñécese o traballo de centros de Educación Infantil e Educación Primaria; mentres que na segunda, a B, se valora o labor dos de Educación Secundaria Obrigatoria, Bacharelato, Formación Profesional, formación de persoas adultas e ensinanzas de réxime especial.
En cada unha delas hai catro galardóns. Así, os centros que obtiveron o primeiro premio reciben 5.000 €, os recoñecidos co segundo 2.500 € e os do terceiro 1.000 €, mentres que os do accésit reciben 500 €. Ademais, os centros galardoados co primeiro premio de cada unha das categorías obteñen o distintivo de Centro Educativo Inclusivo.
A listaxe de centros que recolleron hoxe os premios, correspondentes ás tres últimas edicións, é a recollida na seguinte táboa:
| Premios 2020 | ||
|
Categoría A |
1º premio e distintivo de Centro Educativo Inclusivo | CEIP Plurilingüe Nº 1 (Tui, Pontevedra) |
| 2º premio | CEIP Valle-Inclán (Vigo, Pontevedra) | |
| 3º premio | CEIP Apóstolo Santiago (Santiago de Compostela, A Coruña) | |
| Accésit | CEE de Panxón (Nigrán, Pontevedra) | |
|
Categoría B |
1º premio e distintivo de Centro Educativo Inclusivo | IES Xograr Afonso Gómez de Sarria (Sarria, Lugo) |
| 2º premio | IES Valadares (Vigo, Pontevedra) | |
| 3º premio | CEE Manuel López Navalón (Santiago de Compostela, A Coruña) | |
| Accésit | CIFP Paseo das Pontes (A Coruña, A Coruña) | |
| Premios 2021 | ||
|
Categoría A |
1º premio e distintivo de Centro Educativo Inclusivo | CEIP Plurilingüe A Laxe (Ferrol, A Coruña) |
| 2º premio | CEIP de Quiroga (Quiroga, Lugo) | |
| 3º premio | CEIP Plurilingüe Nosa Señora dos Remedios (Ponteareas, Pontevedra) | |
| Accésit | CEIP Plurilingüe da Torre-Cela (Bueu, Pontevedra) | |
|
Categoría B |
1º premio e distintivo de Centro Educativo Inclusivo | IES de Melide (Melide, A Coruña) |
| 2º premio | IES A Pinguela (Monforte de Lemos, Lugo) | |
| 3º premio | IES de Pastoriza (Arteixo, A Coruña) | |
| Accésit | IES Fernando Blanco (Cee, A Coruña) | |
| Premios 2022 | ||
|
Categoría A |
1º premio e distintivo de Centro Educativo Inclusivo | CEIP do Foxo (A Estrada, Pontevedra) |
| 2º premio | CEIP Plurilingüe Domaio (Moaña, Pontevedra) | |
| 3º premio | CEIP Plurilingüe de Monforte de Lemos (Monforte de Lemos, Lugo) | |
| Accésit | CEE A Barcia (Santiago de Compostela, A Coruña) | |
|
Categoría B |
1º premio e distintivo de Centro Educativo Inclusivo | IES Fernando Blanco (Cee, A Coruña) |
| 2º premio | IES Sanxillao (Lugo, Lugo) | |
| 3º premio | CIFP Paseo das Pontes (A Coruña, A Coruña) | |
| Accésit | IES Valadares (Vigo, Pontevedra) | |
