A iniciativa inclúe obradoiros para aprender a facer un podcast, de cerámica ou risoterapia, así como exposicións ou un faladoiro sobre saúde mental e emocional, entre outras actividades
Santiago de Compostela, 21 de abril de 2023.- A Xunta de Galicia desenvolve durante toda a xornada de hoxe nos Espazos Xove de Betanzos e Lalín diferentes actividades no marco do programa ‘Feira da Primavera’. A directora xeral de Xuventude, Participación e Voluntariado, Cristina Pichel estivo esta mañá coas mozos e mozas que se achegaron ás instalacións de Betanzos e pola tarde estará cos que acudan ás de Lalín.
Durante a súa visita ao Espazo Xove de Betanzos, Cristina Pichel destacou a importancia deste tipo de propostas para que a mocidade poida desfrutar de alternativas de ocio, espazos de entretemento e de foros formativos durante todo o ano.
Así, a programación da ‘Feira da Primavera’ no centro da Xunta en Betanzos incluíu un laboratorio de radio no que alumnado do centro educativo Nosa Señora do Carme ‘Atocha’ fixeron un podcast. Xa pola tarde, celebrarase unha ‘Quedada con amig@s’ e dous novos obradoiros: un de cerámica e outro de merendas saudables. O programa péchase coa inauguración da exposición fotográfica ‘Nos ollos de Yago Regueira’.
Pola súa banda, a proposta de actividades no Espazo Xove de Lalín para o día de hoxe contempla visitas guiadas a unha exposición de Adrián Penido, gañador de varios premios Xuventude Crea nas especialidades de pintura e escultura; obradoiros de manga e risoterapia, así como unha charla sobre a saúde mental e emocional na que participará alumnado do IES Laxeiro. Na xornada de tarde desenvolveranse xogos de rol e un faladoiro sobre o proxecto de intercambio xuvenil Erasmus+.
