O alcalde participou no coloquio universitario organizado pola USC para dar a coñecer as propostas das forzas políticas vencelladas ao eido universitario
Bugallo insistiu na necesidade de “ofrecer oportunidades á xente moza para reter o coñecemento que xera a universidade” porque “Santiago é a capital da cultura pero, tamén, a capital do talento”.
Santiago de Compostela, 12 de abril de 2023. Creación de apartamentos de alugueiro para estudantes, é a proposta que o alcalde de Santiago e candidato á reelección, fixo este martes no debate electoral organizado pola USC para dar a coñecer as propostas en materia de mobilidade, vivenda e colaboración institucional coa Universidade: “propóñolle á USC e á Xunta que colaboremos para crear unhas 200 vivendas en réxime de alugueiro para o estudantado”.
Concretamente o bloque de apartamentos ubicaríase en tres parcelas: en Xoán XXIII, titularidade da Xunta; na Avenida de Castelao no Campus Norte, titularidade da USC; e nas proximidades do CHUS en Volta do Castro, propias do Concello. Arredor de 200 apartamentos poderían xerarse con esta proposta que se faría viable canalizando a promoción das vivendas a través de Emuvissa, da empresa pública de vivenda e solo que pretende recuperar no próximo mandato.
O alcalde insistiu na necesidade de recuperar vivenda para o alugueiro convencional. Neste sentido, Sánchez Bugallo destacou o impacto que tivo a reforma do Plan Xeral que pretende regular o número de vivendas de uso turísitico: “xa no mes de novembro 52 vivendas abandoaron o uso turístico para volver ao convencional e, con isto, vemos como o precio do alugueiro diminúe en Santiago, frente unha subida media neste último mes de 2,8% en Galicia” explica.
Para iso Sánchez Bugallo volveu a reclamar á Xunta de Galicia que defina por decreto que é vivenda baleira: “a Xunta ten todas as competencias en materia de vivenda, tamén a financiación, e é necesario colabore neste traballo”. No mesmo sentido recorda que durante os últimos anos “a aportación en materia de vivenda da autonomía foi cero, ningunha vivenda de protección oficial, nada”.
O novo prego de autobuses, a licitación a próxima semana
O alcalde anunciou ademais que a próxima semana prevé sacar a licitación o novo contrato que significará a renovación de todo o servizo de autobuses e transporte público da cidade. “Serán 58 novos autobuses, cero emisións, con novas rutas e frecuencias adaptadas ás necesidades da veciñanza, tamén da comunidade universitaria”. Ademais, explicou que todos os autobuses contarán con sistemas de aviso visual, con pantallas cos itinerarios e rutas e aviso sonoro, pensando nas persoas con discapacidade auditiva ou visual.
Foi no bloque de movilidade no que Sánchez Bugallo adiantou o inicio do procedemento de licitación do novo prego, que busca contribuír a impulsar o transporte público: “a nova mobilidade, a mobilidade do futuro, debe pasar pola mobilidade peonil no ámbito interno da cidade; transporte público para os concellos próximos, a nosa área perimetral, os barrios e o rural; transporte a demanda para as parroquias de Compostela; e o transporte brandopara aqueles que estean preto, como é a bicicleta”.
Tamén neste sentido, Sánchez Bugallo recalcou a súa intención de volver a por en marcha o servizo de alugueiro de bicicletas “que eliminou o Partido Popular de Santiago tan pronto chegou ao goberno” e insistiu na necesidade de recuperar a para a xestión municipal os párkings de Praza de Galicia e Praza de Vigo, unha vez venza a concesión actual, que será de xeito inminente”.
“A prioridade ten que ser o peón nesa mobilidade do futuro. Estase falando das zonas de baixas emisións, aquí en Santiago fomos precursores en humanizar e peonalizar espazos, comezando pola cidade histórica” explicou o alcalde que recalcou que durante este mandato se completou esa peonalización coa praza de Mazarelos, “que é tamén agora un espazo de convivencia entre a veciñanza e a comunidade universitaria”.
“Santiago ten que ser a capital da industria biotecnolóxica e, en xeral, das novas tecnoloxías”
O alcalde concluíu no debate recalcando que é necesario “ofrecer oportunidades aos máis novos, dotarvos de instrumentos, que vos axuden a iniciar o voso futuro, que vos permitan vivir en Santiago, sen que iso supoña renunciar as vosas aspiracións laborais ou persoais”.
Para iso insistiu na necesidade de “ampliar e mellorar a oferta de vivenda, promovendo vivenda pública e impulsando a recuperación do mercado da vivenda baleira”. Tamén amosou a súa convicción de que “debemos traballar para facer unha cidade amable, coidando das zonas de baixas emisións, impulsando e renovando, como imos a facer, o servizo de transporte público e ofrecendo alternativas de transporte brando e a pé” explicou Sánchez Bugallo que insistiu, sobre todo, en que o obxectivo fundamental da cidade debe ser “impulsar unha economía de futuro”: “Santiago ten que ser a capital da industria biotecnolóxica e, en xeral, das novas tecnoloxías”.
