Diana Sobral: “Isto pon de manifesto que o comercio local da Coruña está máis vivo ca nunca e que os esforzos realizados por este Goberno están a dar os seus froitos”
O Mercado de Elviña celebrou esta mañá a ocupación do 100% dos seus postos, con actividades musicais, talleres de cociña e regalos. A concelleira de Consumo, Mercados e Barrios, Diana Sobral, achegouse ata o Mercado para celebrar cos praceiros e praceiras. “Isto pon de manifesto que o comercio local da Coruña está máis vivo ca nunca e que os esforzos realizados por este Goberno están a dar os seus froitos” sinalou a concelleira.
Este mesmo ano abriuse o mercado de Durmideiras, totalmente renovado tras un investimento de 1,5 millóns de euros e que conta tamén co total da ocupación. Un investimento que se suma á reurbanización da contorna de San Agustín por 619.000 euros e que permite a ocupación dos postos exteriores, algúns xa adxudicados, xunto coa renovación completa do Mercado de Monte Alto por 10,4 millóns de euros. “Temos aberto ademais o concurso de ideas de Santa Lucía, unha demanda histórica da veciñanza e que demostra a aposta da nosa alcaldesa, Inés Rey, polos mercados municipais e o pequeno comercio” subliñou Sobral.
Esta é a primeira vez na que o Mercado de Elviña está ao total da súa ocupación, que conta con 56 postos en funcionamento e arredor dunhas 80 persoas empregadas en total. É ademais o único mercado municipal de Galicia destas características que conta coa totalidade das localizacións en funcionamento. “Un motivo de celebración que hoxe compartimos cos praceiros e praceiras de Elviña así como coa veciñanza do barrio” concluíu.
