A programación da oitava edición do Festival Internacional do monólogo teatral Singular continúa esta fin de semana no Pazo da Cultura. Na xornada de mañá venres poderase ver a peza “Feirantes” -20.30 horas-, da compañía galega Teatro do Noroeste. A actriz Imma António protagoniza este monólogo, baseado nas narracións de Álvaro Cunqueiro recollidas no seu libro “Os outros feirantes”. As andainas de curiosos personaxes aparecen recollidas nesa publicación e este monólogo é un homenaxe a eses personaxes que aínda habitan moitas aldeas de Galicia e, en definitiva, un homenaxe a Álvaro Cunqueiro, un dos máis recoñecidos novelistas e dramaturgos galegos do século XX.
Na xornada do sábado será o turno de Diana Seira, de Galicia, que protagonizará “The Witch, un espectáculo ritual” -20.00 horas-. Trátase neste caso dunha peza ritual que convida ao público a vivilo, no que unha cómica, unha menciñeira e unha acusada entrelazan as súas historias a través da palabra, a imaxe e a acción, convertíndose as tres nunha.
Finalmente, o domingo 26 representarase un espectáculo para público familiar e infantil, “Filipa cos contos”, da compañía galega Bandullo Azul -18.00 horas-. O Café Teatro do Pazo será o escenario elixido para que o actor Fran Campos represente esta obra xunto coa súa amiga Filipa. Entre os dous farán unha sesión de contos para toda a familia con historias tradicionais, música e humor.
As entradas dispoñibles para estes espectáculos poden adquirirse no despacho de billetes do Pazo da Cultura ou na web do Padroado da Cultura: www.padroadodecultura.es.
