A directora xeral da Axencia Galega de Desenvolvemento Rural e o alcalde de Boqueixón explicáronlle hoxe aos veciños as particularidades deste proceso de reestruturación
A nova parcelaria de Boqueixón reorganizará 1.957 hectáreas e beneficiará a 1.195 propietarios e 136 explotacións agropecuarias
A directora xeral da Axencia Galega de Desenvolvemento Rural, Inés Santé, mantivo esta mañá unha reunión informativa cos veciños beneficiados pola concentración parcelaria de Lamas, Loureda, Sergude e Vigo, no concello coruñés de Boqueixón. Este proceso prevé reorganizar unha superficie de 1.957 hectáreas divididas en 10.460 parcelas, propiedade de 1.195 veciños e veciñas.
Unha reunión que tivo lugar no local social de Lamas e na que a Inés Santé estivo acompañada polo alcalde de Boqueixón, Manuel Fernández Munín; o deputado autonómico Ovidio Rodeiro Tato; e técnicos da Consellería do Medio Rural. A directora xeral sinalou que para levar a cabo este proceso, a Xunta ten previsto investir un orzamento de 5.871.000 euros, co fin de mellorar a estrutura territorial da zona e beneficiar tamén as 136 explotacións agropecuarias existentes.
Concentración en Boqueixón
Manuel Fernández Munín lembrou que “foron os veciños e veciñas quen solicitaron este proceso de concentración, que dende o principio foi apoiado polo Concello para reorganizar mellor o territorio e mellorar as condicións técnicas e económicas das explotacións en activo que hai na zona, na súa maioría de vacún, équidos e porcos”.
Pola súa banda, Ovidio Rodeiro fixo fincapé na importancia de que toda a veciñanza recompile toda a documentación referida ás súas propiedades para dispoñer dela cando se inicie o procedemento, que os técnicos agardan que sexa a finais deste ano 2023. De feito, o próximo investimento serán os 472.084 euros destinados á contratación da empresa que se encargará do levantamento topográfico e redacción das bases da concentración parcelaria.
O uso do solo forestal é maioritario na zona da parcelaria de Lamas, Loureda, Sergude e Vigo xa que a superficie ocupada por terreos forestais, pastos arbustivos e terras arables ascende ao 97,82%. Así, a futura redistribución de cultivos permitirá un mellor aproveitamento dos predios de substitución, pensando máis na mellora dos accesos e na forma dos predios que nun cambio do propio cultivo. Ademais, con esta reestruturación aproveitaranse os abandonos e matogueiras, que poden integrarse na superficie agraria útil das explotacións. Isto repercutirá positivamente nos seus propietarios, que poderán aumentar a carga gandeira e o nivel competitivo das súas explotacións.
Parcelarias en Galicia
Ao igual que o resto de parcelarias decretadas nos últimos anos, este proceso declárase mediante a Lei de mellora de estrutura territorial de Galicia (Metaga), que busca aumentar a base territorial das explotacións e reducir os seus custos de produción. Este proceso forma parte das 28 concentracións decretadas pola Xunta desde o ano 2021 e ata a actualidade.
Suporán a reestruturación de máis de 22.800 hectáreas distribuídas en case 110.000 parcelas de algo máis de 16.000 titulares. Para isto, a Consellería ten asignados 17 millóns de euros nos orzamentos de 2023 para seguir traballando nestes procesos de reestruturación. Ademais, este ano impulsarase un Plan extraordinario para arranxar camiños en concentracións parcelarias que estará dotado con 6 millóns de euros en 2023.
Nesta liña, entre os anos 2020 e o que levamos de 2023 rematáronse 25 novas concentracións parcelarias en Galicia, que abarcan un total 18.000 hectáreas, beneficiando preto de 12.500 propietarios que recibiron máis de 28.000 títulos de propiedade. O obxectivo é acadar a trintena de procesos -tanto decretados como finalizados- no primeiro semestre deste ano.
Ademais, xunto coas parcelarias, seguiranse impulsando tamén os procesos que pon a disposición a Lei de recuperación da terra agraria de Galicia. Desde a entrada en vigor da norma, arredor de 10.000 hectáreas de terreo están sendo obxecto de desenvolvemento dun instrumento de recuperación de terra agraria, correspondentes a 21 polígonos agroforestais, a 21 aldeas modelo e a permutas no concello de Friol, na provincia de Lugo.
