Un tramo da senda peonil e ciclista entre Freixeiro e Xuvia foi o lugar elixido para retomar a plantación promovida na cidade pola Corporación Masaveu, á que pertence Cementos Tudela Veguín. A alcaldesa, Marián Ferreiro, e o edil de Parques e Xardíns, Ibán Santalla, participaron na convocatoria xunto co responsable de Medio Ambiente e Enerxía do grupo Masaveu Industria, Fernando Fernández-Tresguerres; a subdirectora da planta Cementos Tudela Veguín, do Grupo Masaveu en Castro, Marta Ferro, outros representantes da citada empresa e algo máis de medio cento de alumnas e alumnos de sexto curso de Primaria do colexio Santiago Apóstol de Narón.
Profesionais da empresa de mantemento de xardíns da cidade encargáronse de ofrecer aos escolares unhas explicacións sobre o proceso da plantación para que, a continuación, comezasen por grupos a plantar vinte árbores de dúas especies, freixos e os coñecidos como “árbores do amor”. Os exemplares quedaron identificados cos nomes dos rapaces e rapazas, que contaron coa axuda de persoal docente do centro, dos representantes do goberno local e da empresa no proceso da plantación. Os escolares quixeron aproveitar a ocasión para que a alcaldesa lles asinase as camisetas que lles entregaron dende a empresa con motivo desta actividade.
Ferreiro agradeceu “a implicación da Corporación Masaveu, coa que un ano máis quixemos colaborar para levar a cabo esta actividade medioambiental con escolares e a través da que se levan plantado decenas de árbores en diferentes ubicacións da cidade, tanto na zona rural, como é o caso de Castro e Sedes, como na urbana, sumándose A Gándara e Xuvia á zona elixida para a plantación desta mañá”.
A actividade responde a unha campaña de sensibilización medioambiental que desde hai varios anos impulsa na localidade a Corporación Masaveu.
Unha vez rematada a plantación, e antes de regresar os escolares ás aulas, os participantes degustaron un aperitivo nas instalacións do Centro Cívico Social de Piñeiros.
