Indica que o plan recolle un investimento por parte da empresa de 195 millóns de euros para estender a rede de gas natural en 44 novos municipios (o que beneficiará a 410.000 galegos) e 20 polígonos industriais, ademais de potenciar o uso do gas natural comprimido (GNC) no transporte
O presidente da Xunta, Alberto Núñez Feijóo, salientou hoxe que o Plan de gasificación de Galicia 2015-2020 repercute sobre tres ámbitos prioritarios para o Goberno galego: o económico, o medioambiental e o do benestar. Segundo remarcou, este acordo permitirá que en 2020 oito de cada dez galegos e un total de 63 polígonos industriais da Comunidade teñan xa acceso ao gas natural.
O mandatario galego, xunto ao presidente de Gas Natural Fenosa, Salvador Gabarró, presentou hoxe este plan de actuación que recolle un investimento de 195 millóns de euros para estender a rede de gas natural en 44 novos municipios (o que beneficiará a 410.000 galegos) e 20 polígonos industriais. E que, ademais, prevé potenciar o uso do gas natural comprimido (GNC) no transporte. Isto, dixo, posibilitará que en 2020 113 concellos, un 64% máis, e 1,3 millóns de vivendas en Galicia dispoñan deste servizo.
Feijóo asegurou que desde o punto de vista económico, mellorar o acceso ao gas natural na Comunidade significa aumentar a competitividade das empresas e da industria porque a súa utilización require dun nivel moi baixo de investimento, ofrece un alto rendemento e permite obter procesos con elevada eficiencia enerxética. Desde o punto de vista medioambiental, engadiu, trátase dun combustible menos contaminante cuxa rede de abastecemento contribuirá á vertebración do territorio galego.
E, desde o punto de vista do benestar, o titular da Xunta destacou que favorecer o acceso a este servizo supón non só un aforro para as familias (en relación a outros combustibles máis caros como o gasóleo), senón tamén unha fonte de enerxía que mellora a habitabilidade das vivendas e a calidade de vida dos galegos e galegas. Desenvolver este Plan de gasificación de Galicia 2015-2020 que vai acometer Gas Natural Fenosa é, polo tanto, un modo de beneficiar as familias, de impulsar o tecido industrial e de avanzar na cohesión territorial a través das infraestruturas.
44 concellos e 20 polígonos industriais máis
Segundo precisou, a extensión da rede de gas natural nos 44 municipios farase forma progresiva, de modo que en 2015 chegará aos concellos de Burela, A Estrada, Foz, O Grove, Noia, Pontedeume e Ribadeo. En 2016, a Arzúa, O Barco, Carballo, Cedeira, Melide, Sada, Verín e Xove. En 2017, a Boiro, A Guarda, Guitiriz, Monforte de Lemos, Muros, Porto do Son e Sarria. En 2018, o plan prevé achegar este servizo ata Bergondo, Cariño, Ortigueira, Quiroga, Rianxo e Tomiño. En 2019, a Allariz, Cabanas, Camariñas, Celanova, Chantada, A Fonsagrada, Ordes, A Rúa, Silleda e Vimianzo. E, finalmente en 2020 serán Cuntis, Meira, Mondoñedo, Monterroso, Ribadavia e Valdoviño os concellos beneficiados.
No tocante aos parques empresariais, Feijóo apuntou que na provincia da Coruña serán un total de 10, pertencentes aos concellos de Bergondo, Padrón, A Pobra do Caramiñal, Cambre, Carballo, As Pontes, Santa Comba, Oroso, Ribeira e Betanzos. Na provincia de Pontevedra, os polígonos industriais aos que se achegará este servizo serán os dos concellos de Lalín, Vilanova de Arousa, Cambados-Ribadumia, Vilagarcía de Arousa, Meaño, Tui e Salvaterra. E, no relativo á provincia de Ourense, a instalación desta infraestrutura acometerase no parque empresarial de Xinzo de Limia e de Pereiro de Aguiar.
840 novos quilómetros de rede e 900 postos de traballo
En total, trátase de 840 novos quilómetros de rede de distribución de gas natural que, en 2020, sumarán máis de 4.000 km, e que xerarán 900 postos de traballo que son os que requirirá a construción das infraestruturas necesarias. Ademais, dixo, esta rede acadará en cinco anos máis de 370.000 puntos de subministración entre empresas e fogares, un 50% máis dos actuais; e permitirá acadar un aforro conxunto acumulado na factura enerxética de 5.400 millóns de euros, contabilizados desde que en 1998 se iniciou a planificación gasística da Comunidade.
O presidente galego destacou tamén que outro dos puntos do acordo é a aposta polos novos usos do gas natural e, por iso, o plan potenciará o uso do gas natural comprimido (GNC) nas flotas urbanas municipais de autobuses e na recollida de residuos sólidos urbanos das sete grandes cidades galegas. Prevese, polo tanto, reforzar a rede de estacións de GNC na Comunidade, onde xa existen dúas estacións públicas e sete para flotas privadas, lembrou.
Feijóo salientou que supón un paso máis na política enerxética da Xunta que se suma á aposta que vén facendo polo gas natural licuado (GNL) e que encaixa no compromiso do Goberno galego coa implantación dun modelo enerxético máis ecoeficiente e menos custoso.
En virtude deste acordo, explicou, Gas Natural Fenosa tamén garante o mantemento das infraestruturas de distribución de gas natural naqueles municipios onde xa hai este servizo, porque, lembrou, o plan será custeado na súa totalidade pola empresa e a Xunta asegurarse do cumprimento dos seus obxectivos a través da creación cunha Comisión bilateral de seguimento.
O titular da Xunta concluíu asegurando que con este plan Gas Natural Fenosa volve corroborar o seu compromiso con Galicia, e confinado en que sexa un precedente a seguir noutros sectores nos que esta empresa e a Comunidade teñen seladas alianzas de futuro.
