O día grande do carnaval vivirase en Moeche este martes, nunha festa que terá lugar na nave do mercado a partir das 17:00h. A cita organizada polo Concello estará aberta a todos os públicos, aínda que dirixida especialmente á xente miúda, que contará con inchables, cama elástica, xogos e música con LaGuaGua.
Tamén volve o concurso de disfraces con categorías individual infantil, individual adulta (máis de 12 anos) e grupos. O desfile perante o xurado comezará sobre as 19:00h e os premios en cada apartado entregaranse tralas deliberacións. A partir das 18:00h tamén se servirá chocolate con churros acabados de facer.
Este será o primeiro Entroido da nova normalidade, libre das restricións sanitarias que houbo que poñer en práctica o ano pasado. Ademais, ao ser o Martes de Entroido festivo local, o Concello agarda que a nave do mercado volva encherse de troula tanto ou máis que antes da pandemia. E se a iso lle sumamos que para mañá se agarda auga, Moeche será o mellor lugar para pasar unha tarde de máscaras e diversión.
Sábado 4 de marzo, 21:00h – Cea baile da Comisión de Festas de Abade
Pasado o carnaval, e encarando xa a primavera, a Comisión de festas de Abade 2023 organiza unha cea baile na Nave do Mercado. A parte gastronómica inclúe sopa de marisco, codillo asado, sobremesa, café e licor, ao prezo único de 20€. As nenas e nenos ata 12 anos terán menú infantil gratuíto. Da parte musical encargaranse Alberto Bellón e o Dúo D’Ases.
As reservas poden facerse ata o día 28 de febreiro chamando ao 669 433 488, 649 287 881 ou 664 215 573. Hai máis información na páxina de Facebook “Comisión Festas Abade 2023”.
