Dez emprendedores poderán utilizar os servizos do Viveiro de Empresas de Riveira durante un tempo inicial de dous anos
Esta mesma semana o Concello de Riveira recepcionou as obras do Viveiro de Empresas e o vindeiro luns será levada ao pleno da Corporación (hoxe publícase ademais na sección web de participación cidadá Lexisla con Nós) a ordenanza reguladora desta infraestrutura, construída co fin de contribuír á creación de iniciativas económicas que potencien e diversifiquen o tecido empresarial de Riveira e permitan xerar riqueza e emprego na localidade.
O servizo fundaméntase en ofrecer, a través dun réxime de aluguer temporal, un espazo físico equipado para o funcionamento do negocio e unhas instalacións comúns. Neste senso, o viveiro, situado en Fafián nas instalacións reformadas do antigo matadoiro, consta dunha superficie de 362 metros cadrados distribuídos en 10 despachos de entre 10 e 15 metros cadrados, sala de usos múltiples, sala de reunións, aseos e zonas comúns.
Os usuarios recibirán servizos de asesoramento e formación en canto ao estudo e análise de proxectos: asesoría xurídica, fiscal e laboral; apoio na busca de financiación e apoio á consolidación.
Beneficiarios
De acordo coa normativa, poderán ser beneficiarios as empresas que comecen a súa actividade no propio viveiro, as de recente creación (xa existentes cunha antigüidade máxima do negocio de 24 meses dende o inicio da actividade ata a presentación da solicitude), as empresas xa constituídas cunha antigüidade superior aos 24 meses e os emprendedores que precisen un espazo adecuado para estudar e preparar o seu proxecto.
No que respecta ao seu modelo de xestión, a ordenanza prevé no seu artigo 2.6 que “o servizo […] poderá ser xestionado directa ou indirectamente polo Concello de Riveira, por calquera das formas admitidas polo Ordenamento Xurídico”, en tanto que a selección dos beneficiarios poderán ser realizada por dous métodos (artigo 5.1): convocatoria pública conxunta, total ou parcial, dos espazos do viveiro, ou ben convocatoria continua en función das vacantes e demandas existentes. O órgano competente para a resolución dos procedementos de selección será a Xunta de Goberno Local, previo informe do grupo de estudo que se designe ao efecto e conforme a unha serie de criterios que inclúen a viabilidade técnica e económica da actividade, os postos de traballo indefinidos xerados, o carácter innovador da actividade, se é unha empresa nova ou recente, se os promotores son veciños de Riveira ou doutros concellos de Arousa Norte e Porto do Son, e se algún dos promotores está en situación de desemprego (artigo 8.1). As empresas que non sendo seleccionadas non cumpran os requisitos pasarán a unha listaxe de espera.
O prazo máximo de estancia no viveiro é inicialmente de dous anos, podéndose prorrogar nun ano máis no caso de que haxa vacantes. Non obstante, co fin de apoiar aquelas empresas que necesiten algún tempo máis para a consolidación do seu negocio, excepcional e xustificadamente, poderá incrementarse este prazo por un ano máis, previa solicitude e fundamentación do interesado.
Tocante aos prezos, o prezo do local será de 75 euros mensuais, cabendo así mesmo a facultade de alugar a sala de usos múltiples por 35 euros durante unha semana ou por 75 se é un mes.
Viveiro virtual
O regulamento tamén prevé a posibilidade da constitución dun viveiro virtual, en función da capacidade do Concello, ao que poderán acollerse tanto viveiristas que deixen a instalación como empresas en proxecto ou xa constituídas que non precisen, polas características da súa actividade empresarial, dun espazo físico onde ubicarse, pero si a infraestrutura, loxística e servizos que o viveiro oferta.
Os emprendedores que se acollan a esta fórmula poderán beneficiarse da utilización gratuíta da sala de reunións tres veces ao mes e o acceso aos servizos de asesoramento e aos programas de formación e información das actividades que se promovan, ademais de poder utilizar determinados servizos comúns como é o caso da reprografía.
