Evencio Ferrero e os concelleiros Juan Seoane e Luis Lamas visitárona hoxe
O alcalde, Evencio Ferrero, e os concelleiros de Mobilidade e Obras, Juan Seoane e Luis Lamas, visitaron as obras de construción da gran rotonda que regulará os accesos a Carballo na zona da Revolta. Os traballos entraron xa na recta final, e está previsto que rematen este mesmo mes.
As obras da rotonda son executadas por Excavaciones y Obras Candal, cun orzamento de 197.218,86 euros. A glorieta, prevista no PXOM, ten como finalidade mellorar o cruce da estrada comarcal co sistema viario do ámbito de solo urbanizable terciario no que se está a construír o Parque Comercial A Revolta, que tamén está moi avanzado e ten xa fixada a data de apertura para principios de maio.
Dado que a glorieta está situada, en parte, nese ámbito e ademais constitúe un dos accesos ao mesmo, en outubro do ano 2019 asinouse un convenio urbanístico entre o Concello de Carballo e a empresa promotora para a construción da rotonda, que, dado que se sitúa nunha vía de titularidade autonómica, conta tamén coa aprobación da Axencia Galega de Infraestruturas (AXI).
Aínda que a glorieta contará con catro ramais, no momento da súa posta en marcha terá só tres activos: os dous da estrada AC-552 e o da rúa Laranxeiras, que constitúe o acceso ao sector comercial. O cuarto, previsto no PXOM para o cuadrienio 2028-2032, permitirá no seu momento continuar a rúa Alfonso Daniel Rodríguez Castelao ata ese punto da avenida da Revolta, pechando a ordenación do solo urbano cara o parque fluvial da Cristina.
O proxecto en execución ten en conta as necesidades de mobilidade nun horizonte de vinte anos, no que se calcula que o tráfico nese punto pode duplicarse, en boa parte debido á incidencia que terá sobre o mesmo a entrada en funcionamento do Parque Comercial A Revolta.
