Haberá obradoiros, xogos, inchables, degustación de chocolate con churros, orellas e filloas e música en directo cos cantantes das orquestras máis recoñecidas de Galicia
Case setecentas persoas inscribíronse no tradicional Festival de Entroido do Concello de Lousame, que terá lugar no polideportivo municipal Pilar Barreiro Senra este domingo 19 de febreiro, entre as 16:30 e as 20:00 horas. Un festival que este ano estará amenizado pola música en directo da man dos cantantes das orquestras máis recoñecidas de Galicia: Óliver Escobar, da París de Noia; Néstor Peña, da Olimpus; e Diego Moreira, da Panorama, que serán os encargados de dar a benvida á veciñanza.
Paralelamente, o Festival de Entroido de Lousame ofrecerá xogos, inchables e obradoiros de Entroido para os máis pequenos da casa, así como degustación gratuíta de orellas, filloas e chocolate con churros para todas as persoas que asistan. Ademais, haberá caramelos para todos os nenos e nenas que asistan disfrazados.
Para facilitar o acceso, o Concello de Lousame vai empregar o mesmo sistema empregado no Festival de Reis e nos campamentos dos últimos anos: dirección única con entrada pola Fonte do Redullo e saída polo CPI Cernadas de Castro. Así, os pequenos poden quedar na festa mentres a persoa adulta aparca nunha das tres zonas dispoñibles na contorna: entrada do colexio, no campo vello de fútbol de Cruído ou na propia subida do Redullo (carril dereito).
