O director de Competitividade de Turismo de Galicia, José Luís Maestro, presentou Galicia como destino termal nun escaparate internacional único xa que a Asemblea conta coa participación das autoridades turcas encabezadas polo Ministro de Sanidade, os mellores especialistas europeos do sector e representantes das principais cidades termais Europeas
Galicia foi presentada como novo socio da Asociación Europea de Cidades Históricas (EHTTA) na súa Asemblea Xeral que tivo lugar na localidade turca de Bursa os días 19, 20, e 21 de outubro.
O director de Competitividade de Turismo de Galicia, José Luís Maestro, presentou Galicia como destino termal nun escaparate internacional único xa que a Asemblea conta coa participación das autoridades turcas encabezadas polo Ministro de Sanidade, os mellores especialistas europeos do sector e representantes das principais cidades termais Europeas.
No encontro debateuse ademais, os principais obxectivos e liñas de actuación da Asociación para os próximos anos, con finalidade de facela máis competitiva e fomentar o seu crecemento sustentable.
Así mesmo, redactouse un documento que define o programa de actuación para o próximos tres anos e inclúe os obxectivos, os medios de financiamento, as ferramentas e os pasos a seguir para levalos a cabo. O obxectivo principal desta guía é reforzar catro alicerces esenciais para a Asociación: a dirección e a gobernanza; a construción e crecemento da rede europea; a comunicación e promoción e finalmente, a cooperación con posibles promotores.
Asociación Europea de Cidades Históricas e Termais
A Asociación Europea de Cidades Históricas e Termais (EHTTA) fundada en 2009, é unha rede composta por 36 cidades termais de 12 países europeos, onde figuran, entre outras, Evian e Vichy –Francia-, Bath -Reino Unido-, Ourense –España-,Baden Baden –Alemaña-, Acqui Terme e Montecatini –Italia-, Rexión de Karlovy Vary -República Checa-, Budapest –Hungría-, Spa –Bélxica- ou Bursa –Turquía-. Todas contan cun patrimonio arquitectónico singular e emblemático vinculado á presenza de augas termais con propiedades beneficiosas recoñecidas en toda Europa.
A Asociación ten como obxectivos o recoñecemento por parte da Unión Europea da singularidade cultural e innovadora das cidades membro, para poder desenvolver a súa actividade turística dentro dun plan transfronteirizo baixo a marca ‘Destino Europa’.
Así, a EHTTA estimula o desenvolvemento e reestruturación económica destas cidades termais, salvagardando o seu patrimonio histórico termal a través do intercambio de experiencias e boas prácticas a nivel europeo.
Os principais obxectivos da asociación, baseada na necesidade de impulsar e protexer o patrimonio cultural e artístico asociado ao termalismo ao longo do territorio de Europa, son:
– Crear unha rede de asociados forte, tanto de balnearios como de cidades e rexións termais promovendo o intercambio de experiencias entre os múltiples operadores culturais
– Promover o sistema a nivel Europeo implicando ás diversas institucións a través do apoio diversos Proxectos Europeos co obxectivo final de crear unha Ruta Europea de Balnearios e cidades termais.
– Impulsar, promover e desenvolver unha investigación analítica e estatística do sector termal, centrándose principalmente no patrimonio artístico, cultural, arquitectónico e nas propiedades terapéuticas.
Itinerario Cultural Europeo de Cidades Termais
A primeira acción levada a cabo por EHTTA foi a creación do Itinerario Cultural Europeo de Cidades Termais como unha ruta que nos conduce a través das vilas e cidades que se desenvolveron en Europa ao redor da cultura Termal.
A ruta une de forma virtual o patrimonio histórico e cultural das vilas e cidades termais e promociona a calidade das súas augas termais.
Este itinerario é unha das 26 rutas culturais recoñecidas polo Consello de Europa e entre as que figuran exemplos como o Camiño de Santiago.
