Inés Rey supervisou hoxe as obras de remodelación do inmoble, despois de catro meses de intervención, unha primeira etapa centrada en eliminar engadidos e partes en mal estado
A reforma da Casa Veeduría, ademais de permitir a ampliación do centro cívico da Cidade Vella e a creación dun centro de día, inclúe a disposición dunha sala de estudos, un auditorio e unha sala de exposicións
A alcaldesa, Inés Rey, supervisou esta mañá os traballos de remodelación da Casa Veeduría, un espazo emblemático da cidade que está a ser rehabilitado polo Goberno municipal co obxectivo de recuperalo na súa totalidade para o uso da cidadanía, ampliando as instalacións do centro cívico da Cidade Vella —que ocupa unha cuarta parte do inmoble—, e creando, ademais, un centro de día.
A Casa Veeduría construíuse no século XVIII e reformouse en profundidade nos primeiros anos do século XX. A superficie total do inmoble —que ocupa o quinteiro comprendido entre as rúas Damas, Veeduría, Alfonso IX e Amargura— é de 3.878 metros cadrados. Inés Rey subliñou, a este respecto, que “a intervención que estamos a levar a cabo busca unha rehabilitación total do edificio, restaurando o noso patrimonio e contribuíndo a revitalizar os servizos no barrio da Cidade Vella”.
Neste sentido, os traballos de remodelación, que contan cun orzamento de 2.993.268 euros, comezaron o pasado 30 de setembro. Cúmprense, actualmente, algo máis de catro meses no referente ao prazo de execución da obra, fixado en 15 meses. A alcaldesa detallou que esta primeira fase “centrouse na eliminación de engadidos e partes en mal estado nos recintos interiores”, limpieza que abre paso a unha nova etapa de traballos, coa implantación das instalacións eléctricas, de ventilación e calefacción.
“Rematouse co vaciado do inmoble para a recuperación dos seus espazos orixinais. E agora, comeza o proceso de construción para darlle unha nova forma e unha nova vida ao edificio”, agregou a rexedora. Nesta segunda fase, o Concello prevé a disposición de novos chans de madeira de carballo, e de terrazo no caso das zonas comúns como os corredores e os distribuidores.
Prioridade á restauración dos elementos xa existentes na Casa Veeduría
Ademais, e co obxectivo de respectar a disposición dos circuítos de mobilidade na CasaVeeduría nos seus inicios, o Concello está a rehabilitar a escaleira institucional do inmoble,que volverá a conectar a planta baixa e o primeiro andar, tal e como foi concibida. Desta forma, será a escaleira de servizo, que conecta actualmente a planta baixa co soto, a que se ampliará para que pase a comunicar tamén o primeiro e o segundo andar da Casa Veeduría.
O concelleiro de Urbanismo, Vivenda, Infraestruturas e Mobilidade, Francisco Díaz Gallego,destacou que a mobilidade vertical no interior do inmoble tamén se facilitará a través doascensor, xa en funcionamento, disposto no centro cívico da Cidade Vella, recinto integrado na Casa Veeduría e que, tras as obras, “estará totalmente conectado co resto do edificio”.
“Estamos a poñer en valor os elementos xa existentes, restaurando todo o posible”, apuntou Inés Rey. Por exemplo, coa rehabilitación dun dos dous patios interiores do inmoble, “que estaba infrautilizado, e que recuperamos para gañar en iluminación e ventilación no interior do edificio”.
A reforma da Casa Veeduría, ademais de permitir a ampliación do centro cívico da Cidade Vella e a creación dun centro de día, inclúe a disposición dunha sala de estudos, un auditorio, unha sala de exposicións, unha zona de xogos e reserva, ademais, un espazo para crear un viveiro de empresas.
