Sempre que se menciona esta cuestión bota man da escusa da suposta necesidade de contar co PXOM, cando, para o caso, non é necesario e, por outra parte, tampouco ten disposición algunha para aprobar o Plan Xeral de Bergondo, como ben é sabido.
Unha das vellas aspiracións de Alternativa dos Veciños (que ademais forma parte do noso programa electoral) é a construción dun centro social en Rois, única parroquia das nove que aínda non conta con esa infraestrutura. Temos abordado este asunto coa alcaldesa en diversas ocasións, sendo sempre a resposta desta ambigua e sempre, tamén, vencellada á suposta necesidade de que o futuro PXOM recolla unha nova parcela dotacional na parroquia onde poder instalar ese centro social. Recentemente outro grupo político da corporación presentaba unha moción ao pleno pedindo ese centro social. A resposta da alcaldesa consistiu en enmendar a moción do grupo propoñente coa inclusión da famosa “coletilla” do PXOM. É dicir, unha vez máis utiliza a coartada/escusa do PXOM para “torear” unha boa proposta.
Dixémolo no pleno e facemos de novo a proposta:
– Non é necesario construír un centro social dun gran tamaño. A veciñanza de Rois o que reclama é un local digno e non ser sempre e para todo a parroquia esquecida.
– Tomamos como referencia o local social de As Angustias (Betanzos), un local digno e con un tamaño axeitado tendo en conta a poboación de Rois e o tamaño da actual parcela dotacional da parroquia, nun lugar estupendo, preto da igrexa parroquial e dos actuais parque e pista deportiva de Rois.
– Un local de aprox. 70 metros cadrados (como o da Angustia) cabe perfectamente na actual parcela e non interfire nin achica (en absoluto) outros equipamentos desa mesma parcela. (Axuntamos planos).
Xa que logo reclamamos á alcaldesa que desbote as súas reticencias ao respecto e encargue xa a redacción do proxecto construtivo dun local social na parroquia de Rois. En caso de non ter tempo ou gañas de levar a cabo esa misión pedímoslle que delegue esa responsabilidade no concelleiro de infraestructuras, Juan Fariña. Fariña farao encantado e sen demoras innecesarias nin escusas sen fundamento.
