A concelleira de Acción Cultural, Mercedes Rosón, presentou en rolda de prensa a publicación, acompañada pola autora, Arantxa Fuentes Ríos, profesora da Facultade de Filoloxía da USC.
O libro, publicado en castelán e en galego e do que o Concello editou unha tirada de 1000 exemplares, recolle dous textos de Victoriano García Martí onde converte a Rosalía de Castro en guía turística da cidade de Santiago de Compostela. A guía inclúe unha breve biografía de García Martí e o trazado dos correspondentes roteiros pola Compostela monumental.
“Con este libro, dunhas 40 páxinas, continuamos recoñecendo a figura de Victoriano García Martí, humanista, escritor e defensor de Galicia, ao que xa homenaxeamos hai algo máis dun ano, o 22 de xaneiro de 2022, cando colocamos unha placa, lémbrandoo, na casa na que viviu, aquí en Santigo de Compostela”, indicou a concelleira de Acción Cultural.
Nas páxinas “unifícanse a querenza que García Martí profesou pola cidade de Santiago de Compostela, á que adicou numerosos ensaios e artigos, coa que profesou pola figura rosaliana”, sinalou citando o texto de Arantxa Ríos. Con esta obra, “imos un paso máis aló, ao trasladar a estes dous roteiros que nos describe a publicación, esta admiración de Victoriano e Rosalía, que se transforma nunha marabillosa simbiose coa cidade de Compostela”
Mercedes Rosón animou a toda a veciñanza de Compostela a percorrer estes dous roteiros, que se suman “aos númerosos paseos que nos ofrece Santiago: literarios, feministas, artísticos, etc., que xa presentamos, aquí, noutras ocasións”.
Da obra fíxose unha edición de cincocentos exemplares en galego e outros tantos en castelán, que están dispoñibles na oficina de Turismo de Santiago e na Zona C, na Praza de Cervantes. A edición desta obra únese a outras accións e actividades programadas pola concellaría de Acción Cultural con motivo do día de Rosalía de Castro, que se celebra o 23 de febreiro, e que se presentarán próximamente.
A autora agradeceu a colaboración do Concello na publicación e salientou que esta obra “é un paso máis aló no rescate da figura de García Martí, esquecida durante anos”. Permite, engadiu, lelo directamente, “achegarse á súa obra”. Da publicación, Arantxa Fuentes destacou o texto no que García Martí, “colle literalmente a figura de Rosalía de Castro e ficcionalízaa, converténdoa nunha guía turística. Unha proposta turística de homenaxe á escritora e de difusión dos seus versos, moi moderna para a época”.
A autora rematou a súa intervención agradecendo a colaboración nesta obra de Agustín González Fernández, autor das fotos, e Víctor Bouzas, que realizou o mapa incluído na parte final da publicación.
A autora
Arantxa Fuentes Ríos é profesora na Universidade de Santiago de Compostela e especialista en Literatura comparada e Teoría da Literatura. A raíz da súa labor investigadora rescatou do esquecemento a figura de Victoriano García Martí, do que publicou diversos traballos científicos. Destaca o libro Por los caminos del siglo XX. Obra periodística olvidada (1914-1963) de Victoriano García Martí, publicado por Alvarellos e o Consorcio de Santiago.
