O alcalde de Riveira, Manuel Ruiz, mantivo na mañá de hoxe unha reunión con representantes do sector do mar do municipio na que, á vista do seu encontro do pasado xoves co presidente de Portos, lles trasladou a necesidade de unirse á hora de acometer a xestión da nova lonxa.
Neste senso, no transcurso da reunión constatouse que é unha preocupación compartida tanto polo rexedor como polo propio sector a de que un posible cambio de xestión sobre o modelo tradicional poida supoñer a perda de postos de traballo e, con tal motivo, subraiouse a conveniencia de avanzar cara un modelo de xestión na que estean representados os distintos colectivos que integran o sector do mar de Riveira e o propio Concello: modelo que se traduciría na constitución dunha empresa mixta.
Con este fin, o próximo paso a dar consiste no estudo das características que debe ter esta empresa para que poida xestionar a lonxa e o papel que debe desempeñar cada parte integrante, algo para o cal é preciso coñecer en primeiro lugar a posición de Portos de Galicia e da Consellería do Mar a este respecto.
Reunión coa conselleira
O alcalde xa fixo xestións para que esta mesma semana se poida reunir coa conselleira Rosa Quintana e cos responsables de Portos para abordar este tema. A intención é poder avanzar a semana próxima as características que debe revestir a empresa mixta e a participación de cada colectivo.
