O pleno aproba un crédito extraordinario de 237.158 para financciar as obras ao abeiro do Fondo de Cooperación da Xunta
O pleno municipal de Lousame aprobou por unanimidade a proposta da Alcaldía para o Plan Único de Concellos “POS+ 2023”, que ascende a 324.530,56 euros, así como os 164.320 euros do Plan Complementario. Así, o Concello de Lousame destinará os 127.210,82 euros da Achega Provincial 2022 a dúas obras: pavimentación do camiño entre Carantoña e Abeixón (87.065,6 euros) e pavimentación do acceso ao núcleo de Aguiende (40.145, 22 euros). Os 197.319,74 euros da Achega Provincial 2023 serán destinados a gasto corrente.
Finalmente, o Pleno aprobou tamén un Plan Complementario por importe de 164.320 euros que inclúe dúas actuacións de mellora da pavimentación en camiños:
– Pavimentación dun camiño de Aldarís a Burzó, por 134.320 euros.
– Pavimentación dun camiño desde a estrada AC.4201 ata a Igrexa de Lousame, por algo máis de 50.000 euros.
Neste último proxecto, a voceira do PSOE preguntou por que as obras non daban comezo ao inicio deste camiño, ao que a alcaldesa lousamiá, Teresa Villaverde, respondeu que se trataba de actuar sobre unhas raíces no camiño e chegar así “a unha zona que se vai poñer en valor con outro proxecto como é a contorna da Igrexa de San Xoán de Lousame.
Crédito Extraordinario
No seguinte punto, o Pleno aprobou sen debate e cos votos a favor de PP e PSOE, e a abstención do BNG, o Crédito Extraordinario 1/2023 para subvencionar os 237.000 euros solicitados ao Instituto Galego da Vivenda e Solo ao abeiro do Fondo de Cooperación para o apoio ao financiamento de actuacións de rehabilitación e conservación do patrimonio construído en concellos de menos de 50.000 habitantes. Un empréstito sen xuros e a devolver en 8 ano e que inclúe cinco proxectos de obras:
– Redución da contaminación lumínica e mellora da eficiencia enerxética no alumeado público do Concello de Lousame, un proxecto orzamentado en 250.107 euros e que inclúe actuacións en Aldeagrande, Marracín e Tállara. O Concello solicita o 15% da actuación, 37.516,05 euros, dos 250.107 euros.
– Pavimentación do núcleo de Camboño, por un importe de 210.174,25 euros, dos que o Concello solicita un préstamo polo 30% da actuación (63.052,27 euros).
– Melloras na contorna da igrexa de San Xoán de Lousame, por un importe de 66.334,11 euros. O Concello solicita o 100% do importe da actuación.
–
– Mellora do lavadoiro de Lesende, que contempla un investimento de 49.545,12 euros e cun prazo de execución de tres meses. O Concello solicita o 100% do importe da actuación.
– Melloras no lavadoiro de Meixonfrío, por un importe de 20.710,69 euros. O Concello solicita o 100% do importe da actuación.
Non se presentou moción algunha e a sesión pechouse con rogos e preguntas.
