A medida, posta en marcha con carácter retroactivo desde o 1 de xaneiro, fixará a tarifa xeral en 0,38 euros por viaxe, a social en 0,12 euros e a a universitaria en 0,15 euros por traxecto
O Goberno municipal aboará ás persoas usuarias —ben na tarxeta Millenium ou na app— o 20 % que lles correspondería polas viaxes realizadas desde o día 1 de xaneiro deste ano
A alcaldesa, Inés Rey, anunciou esta mañá que o Concello da Coruña baixará novamente o prezo do bus urbano, que pasa a custar 0,38 euros por viaxe, un 50 % menos da tarifa establecida. Ao 30 % de desconto que se estaba a aplicar coa axuda do Estado, sumarase agora un 20 % de bonificación adicional.
A alcaldesa lamentou a falta de resposta da Xunta ao respecto das solicitudes cursadas desde o Concello para que contribuíse, como fan outras comunidades autónomas como Madrid ou Valencia, a abaratar o transporte público urbano. Finalmente, e ante a negativa autonómica a axudar co prezo do bus os coruñeses e coruñesas, será o Concello o que asuma o 20 % extra para poder manter as axudas estatais vixentes que se perderían se non se lles sumase a bonificación adicional aprobada hoxe.
“Aínda que reiteramos á Xunta a solicitude de colaboración, mesmo o mes pasado, responderon con silencio e decidiron que os problemas dos coruñeses non eran asunto seu”, indicou Inés Rey.
“Lamentamos profundamente que a Xunta rexeite apoiar os coruñeses a facer fronte ao prezo do autobús urbano, cando si rebaixa o bus noutros lugares. É, sen dúbida, un agravio comparativo para a cidadanía da Coruña. Unha vez máis, é a Administración local a que toma medidas para suplir a falta de implicación autonómica. Deste xeito, non só evitamos que o bus volva ao prezo anterior á bonificación estatal, senón que abaratamos, unha vez máis, para todos os usuarios e usuarias, o prezo do transporte público”, sinalou a alcaldesa.
As novas tarifas do autobús urbano
Coa posta en marcha desta bonificación do 20 %, que comezará a aplicarse este mércores 1 de febreiro, o autobús custará a metade do prezo que pagaban as persoas usuarias antes de setembro, tanto a través da tarxeta Millenium como por medio da app.
TIPO DE TARIFA CUSTO ACTUAL CUSTO DESDE O 1 DE FEBREIRO DIFERENCIA
Xeral 0,52 0,38 -0,14
Social 0,16 0,12 -0,04
Universitaria 0,21 0,15 -0,06
A implantación destas tarifas non implicará que as persoas usuarias leven a cabo calquera tipo de trámite, xa que os descontos aplicaranse automaticamente e será o Concello da Coruña o que asumirá esta nova rebaixa do 20 %.
Aínda que medida se aplicará automaticamente desde o 1 de febreiro, esta iniciativa ten vixencia retroactiva desde o 1 de xaneiro, polo que se aboará ás persoas usuarias —ben na tarxeta Millenium ou na app— o 20 % que lles correspondería polas viaxes realizadas desde o día 1 de xaneiro deste ano.
“Esta rebaixa ten como fin axudar as e os cidadáns nun momento economicamente complexo, e suporá deixar o prezo do transporte público en cifras de hai décadas. Hai vinte anos, o bus urbano na Coruña custaba 0,66 euros por viaxe, e agora quedará en 0,38 euros, practicamente a metade”.
Unha medida que suporá un investimento municipal de 1,2 millóns de euros
A medida anunciada hoxe, destacou a alcaldesa, suporá un custo para as arcas municipais de aproximadamente 1,2 millóns de euros, “que se suma aos que xa tiñamos asumidos coas subvencións en vigor, non só a estatal, senón ás aplicadas xa na tarxeta Millenium e na app”.
A este respecto, recordou Inés Rey, a comezos de outubro, o Concello e a Universidade da Coruña (UDC) implantaron unha rebaixa do 60 % no prezo do bus para case 12.000 estudantes universitarios. Baseándose nesta iniciativa, as persoas usuarias pasaron de aboar 52 céntimos a 21 céntimos por viaxe, desde o pasado 3 de outubro. Agora, con esta nova bonificación do 20 %, esa tarifa volve a baixar a 15 por céntimos por traxecto.
“O bus na Coruña ten unha tarifa establecida en 1,30 céntimos por viaxe, despois de que os tribunais anulasen a baixada unilateral aprobada no anterior mandato. Mais lonxe de subir, o bus baixou na Coruña como non o fixera nunca. Hoxe, o Concello asume na tarifa xeral o 54 % do custo do bus, bonificación municipal que chega ao 86 % no caso da tarifa social”, concretou a alcaldesa, que recordou que fronte a ese compromiso municipal, a Xunta non achega cantidade ningunha para axudar os coruñeses e coruñesas co transporte urbano.
