A concelleira de Formación e Novas Tecnoloxías, Natalia Hermida, anunciou a apertura do prazo de inscrición, hoxe, en dous cursos da plataforma Cemit que se impartirán na Aula Cemit de Xuvia. A edil informou que se trata das accións formativas “Internet e informática básica” e “Tratamento de imaxes/vídeos e a súa difusión”. As persoas interesadas en anotarse poden inscribirse a través dos enlaces: https://cemit.xunta.gal/es/formacion/formacion-presencial/41068 e https://cemit.xunta.gal/es/formacion/formacion-presencial/41069, respectivamente. As sesións impartiranse, en ambos casos, do 22 de febreiro ao 5 de abril.
O curso de “Internet e informática básica” terá unha duración de 124 horas e impartirase en quenda de mañá, de 9.30 a 13.30 horas. Fundamentación da informática, que é un computador, hardware e software, elementos dun computador, introdución ao sistema operativo, uso do procesador de texto, introdución a internet, á web 2.0 e á administración electrónica son algúns dos temas que abordará o alumnado.
En canto ao curso de “Tratamento de imaxes/vídeos e a súa difusión”, terá tamén unha duración de 124 horas, que se impartirán neste caso en quenda de tarde, dende as 16.00 ata as 20.00 horas. As alumnas e alumnos terán a oportunidade de abordar temas como pasar fotos e vídeos da cámara ao disco duro, retoques básicos de imaxe e de cor avanzados, reparar imaxes, efectos especiais, publicar imaxes na nube, engadir animacións e efectos visuais, agregar música e outros axustes de audio e vídeo.
