● A actuación, que discorre ao longo da vía AC-162 ao seu paso polo núcleo, contou cun orzamento de 313.622,10 euros.
● Estes traballos completáronse con outro proxecto de saneamento realizado na contorna da igrexa de Ouces.
● Agora incluirase no Plan Único 2023 a terceira fase, que incorporará á rede de saneamento ás casas desta zona que quedaron fóra.
O Concello de Bergondo finalizou os traballos para completar a rede de saneamento no lugar de Tatín, na parroquia de Ouces. A actuación, que contou cun orzamento de 313.622,10 euros, levou a cabo ao longo da vía AC-162 ao seu paso polo núcleo.
Os traballos incluíron a instalación dunha rede de seis colectores de augas residuais no núcleo de Tatín e nos bordos da estrada AC-162, que discorren por gravidade ata concentrarse nun punto baixo na marxe dereita da vía, próximo ao ‘regacho de Tatín’. Alí implantouse unha estación de bombeo con 2 bombas para impulsar o afluente ata un pozo da rede xa existente en Gandarío e a súa posterior chegada á Estación Depuradora de Augas Residuais.
Ademais, incluíuse a creación de pozos de rexistro e contémplase a reposición do firme afectado polas obras, incluídas as beirarrúas da AC-162. A semana que vén levará a cabo o pintado destas.
En Tatín realizouse outra actuación para completar a rede de saneamento, neste caso na contorna da igrexa da parroquia de Ouces, no lugar de Tatín, un proxecto que contou cun orzamento de 33.481 euros. Os traballos para levar a cabo consistiron na implantación de dous colectores de augas residuais, creación de pozos de rexistro e, posteriormente, a reposición do firme afectado polas obras.
Terceira fase en Tatín
A rede de saneamento en Tatín incorporará proximamente unha terceira fase, que se incluirá no Plan Único 2023 e que permitirá incorporar varias vivendas ao redor da AC-162, as que aínda non contaban con este servizo e que tecnicamente podían entrar neste proxecto.
