– A lei especifica as titulacións precisas para o acceso á Subescala Técnica da Escala de Administración Xeral.
– O Concello de Culleredo abre a participación no proceso selectivo a persoas con titulacións que non están entre as admitidas polo Real Decreto Lexislativo 781/1986.
– Unha norma de rango de Lei, como é o RDL 781/1986, non pode ser modificada por unha norma de rango inferior, como é a convocatoria dunha oposición.
– É preciso iniciar a revisión de oficio do expediente e paralizar as actuacións do proceso selectivo, para evitar lesionar os intereses tanto das persoas interesadas no proceso como do propio Concello, que se pode ver inmerso en novos procedementos xudiciais.
O BNG solicitará, no vindeiro Pleno Municipal, a rectificación da convocatoria do proceso selecito para a cobertura dunha praza de técnica/o de administración xeral, subescala técnica, persoal funcionario de carreira con vínculo fixo.
A lei, concretamente o Real Decreto Lexislativo 781/1986, establece:
“El ingreso en la Subescala Técnica se hará por oposición libre y se precisará estar en posesión del título de Licenciado en Derecho, en Ciencias Políticas, Económicas o Empresariales, Intendente Mercantil o Actuario.”
Malia isto, nas bases do proceso selectivo, no apartado dos requisitos para participar no mesmo, indícase:
“5.5. Titulación: estar en posesión, ou en condicións de obtelo o día que remate o prazo de presentación de instancias do título de grao universitario, licenciatura universitaria ou equivalente.”
Con esta redacción a convocatoria queda aberta a titulacións que non son as especificadas no Real Decreto Lexislativo 781/1986. Tendo esta norma rango de Lei, os seus preceptos non poden ser modificados por disposicións de rango inferior, sendo nulas de pleno dereito as que a contradigan.
Por este motivo o BNG de Culleredo solicitará a incoación dun expediente de revisión de oficio e a suspención do proceso selectivo até a resolución do mesmo.
O BNG vese na obriga, máis unha vez, de reclamar ao Goberno Municipal o repecto á legalidade nas súas actuacións. A reiteración de casos fai que non se poidan considerar meros despistes. O Goberno Rioboo apura os ultimos meses de mandato con actuacións aberrantes que saltan os procedementos. A estas alturas poucas dúbidas quedan da premeditación destas actuacións.
Lembremos que o BNG demandou recentemente que a convocatoria de 5 prazas de policía local se encomendara á Academia Galega de Seguridade Pública, petición que foi rexeitada polo PSOE contando coa abstención do PP.
