O BNG da Barbanza conmemorou os 40 anos da súa fundación cun emotivo acto no que se presentou un libro coa historia da organización e cunha merecida homenaxe a destacados militantes históricos.
A deputada Rosana Pérez agradeceu o traballo da militancia e das persoas simpatizantes que ao longo de catro décadas deron o mellor de si e atribuíu a todas esas persoas o mérito de ter hoxe un BNG forte, convertido na alternativa de goberno.
Segundo a parlamentaria, tres son as fortalezas do BNG: “a primeira é que fomos capaces de facer política en clave galega e xerar solucións adaptadas á nosa realidade, apostamos por solucións e alternativas propias; a segunda é ter unha organización sólida, asentada en todo o territorio e coas ideas claras como que somos nacionalistas, porque o nacionalismo significa cambiar o mundo empezando pola parte que temos máis cerca. E a terceira, porque o BNG é moito máis que unha organización, é un sentimento de amor e un compromiso vital coa nosa nación”, sintetizou “Quero dicirlle á xente moza que pelexa por un traballo digno, ás persoas maiores que non dan estirado máis a pensión, ás familias que non chegan a fin de mes, aos mariñeiros que loitan por cubrir custos; ás persoas autónomas que fan malabarismos para manter en pé os seus negocios, todos e todas poden contar co BNG para conseguir unha saída xusta e galega desta crise” apuntou.
Pérez Fernández reiterou que o BNG ten “as portas a todas persoas que levan a Galiza na cabeza e no corazón”, deixando claro que “ensanchar, ampliar e incorporar son os verbos que hai que conxugar” para sumar a cada vez máis galegos e galegas cos que poder abrir un tempo novo de futuro e esperanza.
Santos Saborido, militante histórico comentou os inicios da organización e como co paso do tempo foron cambiando as cousas “mais aí está o BNG traballando polo ben da xente” declarou.
O ribeirense Manuel Anxo Fernández Baz, autor do libro, debullou a traxectoria de compromiso co País que se recolle no seu libro “40 anos ao servizo da Galiza. BNG, 1982-2022”, na que sintetizou, ano a ano, a historia do Bloque Nacionalista Galego, os principais feitos políticos acontecidos no País e as actuacións chave desenvolvidas polo nacionalismo galego ao longo destas catro últimas décadas.
Finalmente Rubén Cela, presidente da Fundación Galiza Sempre, puxo en valor que a militancia do BNG foi capaz de camiñar a carón da sociedade durante todos estes anos pero tamén foi quen de transformar o país consolidando un proxecto útil para defender os intereses sociais de Galiza en todas as institucións.
O acto finalizou coa entrega duns obsequios a varios militantes como agradecemento a todo o traballo que levan feito ao longo das últimas catro décadas. De Ribeira foron galardoados Xaquín Maño e Áurea Santiago, da Pobra Rosana Pérez, de Boiro Santos Saborido e de Rianxo Nero Abuín e Miguel Ordóñez.
