O Concello de Fene aprobou recentemente por resolución da Alcaldía o Plan de implantación dos Obxectivos de Desenvolvemento Sostible da ONU dentro da Axenda 2030. O documento, promovido pola Concellaría de Servizos Sociais coa participación do tecido social, político e educativo do municipio, pretende ser unha guía de actuación tanto para o consistorio como para a veciñanza de cara a cumprir eses 17 obxectivos mundiais cos que se perseguen dúas fins intimamente ligadas: frear o cambio climático e construír unha sociedade máis xusta.
No caso de Fene, e gracias ao apoio do Fondo Galego de Cooperación e Solidariedade, o plan artellouse partindo dunha diagnose inicial do territorio -saber como estamos agora- para logo poñer negro sobre branco todas aquelas cousas que cómpre cambiar ao longo dos próximos anos para achegarnos no posible á sostenibilidade da que fala cada apartado dos ODS. A vixencia inicial do plan será de tres anos, tempo no que deberá facerse un seguimento constante sobre o cumprimento das accións propostas.
O contido do Plan de Implementación dos ODS en Fene presentouse onte na Casa da Cultura, nun acto ao que asistiron representantes do persoal municipal, de entidades veciñais, dos centros de ensino e do Fondo Galego.
A finalidade do encontro foi a de repasar as accións que se deberán desenvolver en cada liña estratéxica e, en último caso, lograr a máxima concienciación e compromiso social para que Fene alcance os obxectivos de desenvolvemento sostible.
