• Terá lugar o martes, 24 de xaneiro, no centro municipal de formación, no Polígono de Cuíña ás 11 horas
• Explicaranse as bases de axudas que impulsen a xeración de novas actividades e a diversificación económica a través do apoio a novas iniciativas empresariais
O Concello de Ortigueira organiza o vindeiro martes, 24 de xaneiro, unha xornada dedicada a autónomos e pequenas empresas, co obxectivo de informar sobre as axudas existentes do Instituto de Transición Xusta para emprendedores e emprendedoras.
Celebrarase no centro municipal de formación, na nave municipal de usos múltiples que ten o Concello no polígono industrial de Cuíña, de 11 a 12 horas.
O contido da charla estará centrado nas bases das axudas que pretenden impulsar novas actividades e a diversificación económica a través do apoio a novas iniciativas empresariais ou a proxectos de investimento que queren manter o emprego en zonas afectadas polo peche de grandes empresas.
Os posibles beneficiarios destas axudas son as pequenas empresas e autónomos, entre as que tamén se inclúen residencias e centros da terceira idade, discapacitados e outras actividades asistenciais; aloxamentos turísticos; proxectos para o desenvolvemento da sociedade da información, innovación e novas tecnoloxías e comercios polo miúdo de produtos elaborados polos promotores en zonas de transición xusta.
Desde o Concello de Ortigueira animamos a todos e todas a asistir a esta xornada para coñecer de primeira man como funcionan estas axudas e o útiles que poden chegar a ser.
