• As votacións poderanse realizar a través do Facebook municipal ou do servizo de mensaxería de NovasLaxe desde este mércores 28 ata o 4 de xaneiro de 2023
• O obxectivo deste concurso é visibilizar e promover o comercio local durante estas datas
O Concello de Laxe, dentro da programación organizada para estas datas festivas, organiza a segunda edición do certame de escaparates de Nadal no comercio local do municipio co fin de visibilizar os establecementos durante estes días e promover que a veciñanza e as persoas que visiten Laxe merquen os seus agasallos na vila.
Se ben o concurso se iniciou o pasado 19 de decembro coas inscricións dos locais participantes e a toma de fotos dos escaparates por parte de xente do Concello, este mércores 28 é o día oficial no que arrinca o certame.
Desde mañá, e ata o 4 de xaneiro ás 12:00 horas, as persoas que o desexen poderán votar tanto no Facebook municipal como a través do servizo de mensaxería NovasLaxe pola foto do establecemento cuxo escaparate lle guste máis. No caso da rede social, a votación será a través das reaccións de “gústame” ou “encántame”, mentres que en NovasLaxe deberase enviar unha mensaxe espeficando o nome do local participante. Deste xeito, é posible que é unha mesma persoa poida votar dúas veces.
Participan: D’Troula, Estanco Casa López, Perruquería Azabache, Alquimia Parafarmacia e Farmacia Enma González.
O establecemento gañador será aquel que acade unha maior puntuación tras a suma das votacións de ambas as canles. A resolución do concurso, a entrega de diploma e o agasallo conmemorativo realizarase o luns, 9 de xaneiro de 2023.
As bases poden consultarse na páxina web do Concello de Laxe.
